Хятадын дарга Ши Жиньпиний 10 жилийн өмнө санаачилсан “Бүс ба Зам” санаачилгын гурав дахь удаагийн олон улсын форум энэ долоо хоногт Бээжинд үргэлжилж байна. Тус форумд дэлхийн 130 гаруй орны төлөөлөгч уригдсаны дотор ОХУ-ын Ерөнхийлөгч Владимир Путин багтжээ.
Хятадын төв болон зүүн өмнөд Ази, Европ цаашлаад бүх дэлхийтэй холбохоор санаачилсан төсөл Бээжингийн нөлөөг дэлхийн тавцанд өсгөсөн гэж үздэг. Ажиглагчдын харж байгаагаар Ши Жиньпиний санаачилга дэлхийн өмнөд хэсгийн улс орнуудтай харилцааг нь сайжруулж, харин барууны орнуудтай хөндийрөхөд хүргэж байна. Энэ удаагийн форумд Европын Холбоог төлөөлсөн хамгийн өндөр албан тушаалтан нь Унгарын Ерөнхий сайд Виктор Орбан ажээ.
Дайтагч талууд болох Орос, Украины төлөөлөгчдийг Бээжинд урьснаар Хятад энхийг сахигч орны байр сууриа бататгаж байна гэж ажиглагчид үзэж байна. Нөгөө талаар Орос “Бүс ба Зам” санаачилгад нэгдэхээ албан ёсоор баталгаажуулаагүй ч форумд оролцохоор ирсэн нь Орос, Хятадын харилцаа хэрхэн гүнзгийрснийг харуулж байгаа юм.
Орос Украин руу дайрч цэргээ оруулахаас хэдхэн хоногийн өмнө буюу өнгөрөгч оны хоёрдугаар сард Путин Хятадад айлчилж, хоёр улсын нөхөрлөл түншлэлд хил хязгаар үгүй гэдгийг мэдэгдсэн билээ.
