Эрчим хүчний салбар үнээ нэмэхгүй бол хүнд байдалд орсон талаар сүүлийн хэдэн жил ярьж байгаа. Байгуулагдаад 100 жил болсон тус салбарын үнийг өнөөдрийг хүртэл төрөөс зохицуулдаг учраас айл өрхийн цахилгааны үнийг дорвитой нэмэхгүй явж ирсэн. Тиймээс ч сүүлийн гурван жил алдагдалтай ажилласан талаар салбарынхан нь хэлдэг. Тодруулбал, эрчим хүчний салбар 2019 онд 59, 2020 онд 92, 2021 онд 78 тэрбум, 2022 онд 168.2 тэрбум төгрөгийн алдагдалтай ажилласан байна.
Харин өнгөрсөн оны арваннэгдүгээр сард аж ахуйн нэгжүүд 5000 кВт хүртэл хэрэглээтэй бол 14 хувь, үүнээс дээш хэрэглээтэй бол 28 хувиар төлбөрийг нэмсэн байдаг.
Нөгөө талдаа цахилгааны үнийг нэмэхгүй байснаар энэ салбарын ажилчдын цалинг нэмэх боломжгүй байсаар иржээ. Харин Монголын Эрчим хүч геологи, уул уурхайн үйлдвэрчний эвлэлийн холбооноос тус салбарын ажилтнуудын цалинг аравдугаар сарын 1-нээс 20 хувиар, 2024 оны нэгдүгээр сарын 1-нээс 30-50 хувиар нэмэгдүүлэхийг шаардсан. Тэгвэл тус салбарын ажилчдын цалинг энэ сардаа багтаан нэмэх асуудлыг судалж байгаа талаар салбарын сайд Б.Чойжилсүрэн хэллээ.
Тэрээр “Өнөөдрийн байдлаар салбарын дундаж цалин 2.268.000 төгрөг байна. Үйлдвэрчний эвлэлийн байгууллагаас аравдугаар сарын 1-ээс 20 хувиар, он гараад 30 хүртэлх хувиар нэмэгдүүлэх шаардлага тавьсан. Мэдээж энэ асуудлыг ойлгож байгаа. Эрчим хүчний салбарын 24 компани байна. Цалин нэмэхгүй тохиолдолд эдгээр компанийн алдагдал 64 орчим тэрбум төгрөг. Хэрвээ аравдугаар сарын 1-ээс цалин нэмбэл 100 орчим тэрбум төгрөгийн алдагдал хүлээх тооцоо гарсан. Өнгөрсөн долоо хоногийн Засгийн газрын хуралдаанд асуудлыг танилцуулсан. Ингээд долоо хоногоор хойшлуулж, энэ долоо хоногийн Засгийн газрын хуралдаанаар дахин хэлэлцэхээр болсон. Ер нь үйлдвэрчний эвлэлийн шаардлагыг хүлээн авч цалин нэмэхээр асуудлыг судалж байна. Шаардлагын хэмжээнд биш ч нэмэх тооцоо судалгааг төрийн өмчийн 24 компанид хийгээд дуусч байна. Энэ аравдугаар сардаа багтаад тодорхой хэмжээнд нэмнэ.
Ер нь манай салбарын үнийг төрөөс зохицуулдаг. Зардал нь зах зээлийн ханшаар гардаг учраас сүүлийн 30-аад жил бүрэн либералчилж чадаагүй салбарын нэг нь эрчим хүчний салбар” гэсэн юм.
