Евро-2 хөдөлгүүртэй автобусан дээр Евро-5 гэдэг хаяг шошго нааж, хуучныг шинэ, хулхийг ориг гэж хуурч мэхэлсэн нь хотын иргэдээс гадна хотын шинэ даргад ч тодорхой боллоо. Нууц биш нууц болгож хуучин автобусыг шинийн үнээр авсан нь булзах аргагүй, бултах газаргүй нь хэн бүхэнд ил, хүн бүрд ойлгомжтой боллоо. Нэг бүр нь 336 сая төгрөгийн үнэтэй, нүглийн цавчаа ногооны хэргийг нүд цавчих эрхгүйгээр сануулж байна. Автобус нь хуучин ч, хэрэг нь шинээрээ байна. Хуучин дээрээ хуучирч, Тэнүүн-Огоо компанийн хашаанд хэвтэж байгаа хуучин ногоон сэгнүүдийн урьдчилгаанд төлчихсөн гэх 70 тэрбум, захирал А.Ганхуягийнх нь хэлэхгүй гүрийж байгаа үлдэгдэл 60 тэрбум төсвийн дансанд ургахгүй юм.
“Тэнүүн-Огоо” гэдэг компани нам, улс төрчид ирж л байдаг, явж л байдаг гэгчээр Дарханаас ирээд даам гарсны нууц нь ахиад л манан татуулж, будан хөшиглүүлдэгтэй нь холбоотой гэх баримтууд нээлттэй мэдээллийн сангаас илэрч байна. Улсын бүртгэл, опен дата зэрэг мэдээллийн санг шүүрдэж үзэхэд “Тэнүүн-Огоо” компани дөрвөн эзэнтэй, нэг нь А.Баттүшиг гэгч байна. УИХ-ын дарга асан Зандаахүүгийн Энхболдын төрсөн дүү Зандаахүүгийн Хишигтохтой “Инфра инженеринг”, “Браунрок”, “Нью браун стоун” гэсэн гурвын гурван компани хамтран эзэмшдэг юм байна. Нүүрс угаах “Страто” компанийн дуулианаар дүү З.Хишигтогтохтой нь хамт А.Баттүшиг гэдэг нэр анх ил болж анхаарал татаж байв.
“Тэнүүн-Огоо”-гийн өөр нэг эзэмшигч Д.Амгаланбаатар гэгч нь Зандаахүүгийн Хишигтогтох, А.Баттүшиг нарын “Браунрок”, “Инфра инженеринг” компаниудынх нь гүйцэтгэх захирал. Зам тээврийн хөгжлийн сайд, ҮАБЗ-ийн нарийн бичгийн дарга асан А.Гансүхийн төрсөн дүү А.Ганболдын хоёр компанийн бас л захирал нь юм байна. А.Гансүхийг Зам тээврийн дэд сайд, сайд байхад нь Д.Амгаланбаатар 6 жил зөвлөхөөр нь ажилласан. Зам тээврийн дэд сайдын зөвлөх байхдаа өнөөдөр цавчаа ногооны хэрэгт унаад байгаа “Тэнүүн-Огоо” компанийн хувьцаа эзэмшигч болсонтой давхцаж байна. Нэр дээр нь бүртгэлтэй “Робот хөгжил” гэдэг ТББ нь төрийн өмчөөс Зандаахүүгийн Энхболдын хувийн өмч болсон хуучин Геологийн төв лабораторид байрладаг. ҮАБЗ-ийн нарийн бичгийн дарга байхдаа хилээр гарал үүсэл тодорхойгүй 20 сая доллар бэлнээр оруулж байгаад боодолтой мөнгөтэй тентэй машин нь баригдсан хэрэг нь хэрхсэн нь тодорхойгүй замхарсан ч Японы хөрөнгө оруулагчийн “Жапан таун”-ыг газрыг булааж авсан гэх асуудал нь сөхөгдсөн А.Гансүх мөн хотхонд байдаг гэртээ бусдад зодуулсан.
“Тэнүүн-Огоо”-гийн бас нэг хувьцаа эзэмшигч Б.Гонгор гэгч нь Зандаахүүгийн Энхболдын дүү Хишигтогтохтой гурван компани хамтран эзэмшдэг А.Баттүшигийн дотно найз нь юм.
Цавчаа ногооны хэргийн эзэн, хэнгэргийн дохиур “Тэнүүн-Огоо” компанийг дэмждэг Дарханаас гаралтай улс төрч хэн бэ? гэдэг асуултын хариулт түгжрэлийн сайдаас буусан Ж.Сүхбаатарын зүг чиглэж байна. АН-ын А.Гансүх, МАН-ын Ж.Сүхбаатар хоёр МУИС-ийн хуулийн ангийг 1997 онд хамт төгссөн. Тэнүүн-Огоогийн захирал А. Ганхуяг тэр хоёр хоёулаа Дарханых. Хуучин цавчаа ногооныг нэг бүрийг нь 336 сая төгрөгөөр авсан Нийслэлийн худалдан авах ажиллагааны газрын дарга Энхтайван нь Ж.Сүхбаатарын шадар зөвлөх, бас шавь нь. Энхтайваны ангийн найз, түгжрэл бууруулах төслийн ахлагч Батзориг ч мөн Ж.Сүхбаатарын шавь.
Цавчаа ногоон, “Зайл мотор”-ын хэрэгт ороод өөртөө харакири хийж гэдсээ хутгалсан ННТГ-ын дарга, цагдаагийн бэлтгэл хурандаа С.Жавхлантбаатарын дүү С.Жавхлантуяа, эхнэр Д.Дүүрэнжаргал нар нь “Тэнүүн-Огоо” компанийн захирал А.Ганхуягийн хүү Ганхуягийн Намнансүрэнтэй хамтран 2016 онд “Илчит хүлэг”, “Илчит хүлэг тур” компаниуд байгуулсан юм байна. Чонотой нийлсэн нохой гэдэг шиг цавчаа ногоон өгсөн, авсан хүмүүс нэг тал, нэг хармаатай байсныг бүртгэлийн нээлттэй сангууд нотолж байна. А.Ганхуягийн хүү “Зайл моторс”-ын Ким гэгч монголчуудыг шүүхэд өгнө, жижиг алдаа гарсан гэх зэргээр дөвчигнөсөн хэвлэлийн бага хурлаар орчуулагч хийгээд сууж байсан залуу юм. Нууц биш нууцаар 7 компаниас санал авч шалгаруулсан гэх боловч хармаа халаас нэгтэй А.Ганхуягийнхаа “Тэнүүн-Огоо”-г ялуулах сонирхол агуулсан байх магадлалтайг гэдсээ хүүлсэн хурандаагийн бизнесийн ул мөрүүд өгүүлж байна. С.Жавхлантбаатар нь Сонгинохайрхан дүүргийн тээврийн цагдаагийн хэлтсийн даргаас дэвшсэн хурандаа. Сонгинохайрхан дүүргээс хэн гэдэг бөх сонгогдож, хэн гэдэг даргын үед энэ хэрэг явдал мандсаныг үзэгч Та өөрөө сайн мэднэ.
Түгжрэлийн сайд, хотын даргыг солилоо гээд хуучин автобус ул болж, шинэ автобус зул болчихгүй. Хуучин сайд нь огцорч, гишүүнээрээ үлдлээ гээд, шинэ сайд нь хайруулын тавган дээр суулаа гээд хөл дүүжлэх унаа хүрээд ирэхгүй нь үнэн юм. Хотын хуучин дарга хотын намын даргаараа үлдлээ гээд хотын шинэ даргаа Сонгионохайрханы гишүүнээс, Засгийн газрын сайдаас өлгийдөж төрүүлж авлаа гээд өвөл болдгоороо л болох юм.
Цавчаа ногооны цадиггүй улааны зэс ч цухуйж эхэлсэн тул хүнд бүрд хамаатай нийтийн тээврийн асуудлыг эргэн сөхсөөр байх болно.
Эх сурвалж: Zogii.mn
