Өчигдрийн УИХ-ын чуулганы нэгдсэн хуралдаанаар Хүнс, хөдөө аж ахуй, хөнгөн үйлдвэрийн сайдад тавьсан Малчдын өмнө тулгамдаж буй асуудлын талаарх асуулгын хариуг сонссон юм.
Энэ талаар Улсын Их Хурлын гишүүн, Засгийн газрын гишүүн, Хүнс, хөдөө аж ахуй, хөнгөн үйлдвэрийн сайд Х.Болорчулуун мэдээлэл хийв. Тэрбээр “Мал аж ахуйн салбараас жилд дунджаар 500.0-600.0 мянган тонн мах, 15.0-20.0 сая ширхэг арьс шир, 33.0-35.0 мянган тонн ноос, 10.1 мянган тонн ноолуур, 750.0-850.0 сая литр сүү, 225.0-250.0 сая ширхэг өндөг үйлдвэрлэн 2022 оны байдлаар дотоодын нийт бүтээгдэхүүний 12.6 хувийг, нийт экспортын 5.6 хувийг бүрдүүлсэн” талаар онцлов.
УИХ-ын гишүүн Ц.САНДАГ-ОЧИР “21 аймаг, есөн дүүргийн хэмжээнд зоорины асуудал үүссээр байна. Өнгөрсөн жилийн инфляцийн 14-15 хувийн өсөлтөд махны үнэ голлон нөлөө үзүүлсэн. Яагаад гэхээр орон нутаг зоорьгүйгээс болоод хавар мах, ногоо үнэд ордог. Хэрэв зоорьтой бол хямд үнэтэй мах, төмс хүнсний ногоо идэх боломжтой. Мөн нийслэлийн сургууль, цэцэрлэгт зоорины асуудал тулгамдаж байна. Гэх мэтчилэн маш олон талын ач холбогдолтой учир онцгой анхаарал хандуулахыг хүсч байна” гэлээ.
