Хан-Уул дүүргийн 18-р дунд сургуулийн сурагчид дахин хордож эмнэлэгт хүргэгджээ.
Тодруулбал "Монгол бизнес" дээд сургуулийн түрээсийн байранд хичээллэж байсан нэг ангийн хүүхдүүдийн 15 нь эмнэлэгт хүргэгдэж гурав нь хэвтэн эмчлүүлж, үлдсэнийг нь эцэг эхийн хяналтад хүлээлгэн өгсөн байна.
Албан эх сурвалжийн хэлж буйгаар есдүгээр сарын 21-нд хордсон ангийнхан дахин хордсон нь энэ аж. Өөрөөр хэлбэл 20 гаруй хоногийн дараа үйл явдал дахин давтагджээ. Хүүхдүүдийн зарим нь гараа атгаж чадахгүй, хөл нь суларч гишгэж чадахгүй, дотор нь муухайрч бөөлжих шинж тэмдэгт илэрчээ.
Сурагчид хордсон шалтгааныг тодруулахаар НЭМГ, ХУД-ийн цагдаагийн байгууллага, НБГ-ын Хяналт шалгалтын хэлтэс хамтран ажиллаж байна. Мөн хүүхдүүд юунаас хордлого авсныг тодруулах шинжилгээнүүдийг авсан, хариу хараахан гараагүй байгаа гэв.
Гэхдээ одоогоор 18-р сургуулийн сургалтын үйл ажиллагаа хэвийн үргэлжилж байна. Тус сургууль нь нийт 3331 сурагчтай бөгөөд "Монгол бизнес" дээд сургуулийн түрээсийн байранд 6-8 дугаар ангийн 721 хүүхэд хичээллэдэг аж.
Өмнөх хордлогын үеэр хүүхдүүдийн хэлж буйгаар паарны завсар шалнаас эвгүй үнэр үнэртэж эхэлснээр дотор муухайрсан хэмээж байв.
