Өнөөдрийн Засгийн газрын хуралдаанаар Эрүүгийн хууль тогтоомжид ялын бодлогын талаар ямар өөрчлөлт орсон талаар ХЗДХ-ийн сайд Б.Энхбаяр танилцууллаа.
Тэрбээр "Нэгдүгээрт, бүх насаар хорих ял оноохоор заасан хэргүүдэд Эрүүгийн хуульд зааснаар хөөн хэлэлцэх хугацаа тоолдоггүй. Бага насны хүүхдийн эсрэг үйлдсэн гэмт хэргийн хөөн хэлэлцэх хугацааг 20-30 жил болгож байгаа. Бага насны хүүхдийг алах болон хүчиндэх, бэлгийн мөлжлөг гэсэн хэргүүд хөөн хэлэлцэх хугацаагүй болж байна.
Хоёрдугаарт, хүнийг алах гэмт хэргийн хүндрүүлэх бүрэлдэхүүн буюу бага насны хүүхдийг алах, бага насны хүүхдийг хүчиндэх, бага насны хүүхдийн эсрэг үйлдсэн бэлгийн мөлжлөг, хүн худалдаалах гэмт хэргийн хүндрүүлэх бүрэлдэхүүнд өршөөл үзүүлэхгүй.
Гуравдугаарт, сая дурдсан энэ төрлийн дөрвөн гэмт хэрэг болон бусдыг санаатай алах, авлига албан тушаалын бүх төрлийн хэргүүдэд хорих ялыг хугацаанаас өмнө суллахгүй. Бага насны хүүхдийг алах, бага насны хүүхдийг хүчиндэх гэмт хэрэгт оноох хорих ялын дээд хэмжээг 20 жил байгааг 25 жил болгоно.
Сүүлийн таван жилийн байдлаар хүчиндэх гэмт хэргийн хохирогчдын 62.7 хувь нь 18 насанд хүрээгүй хүүхэд байсан байна. Хүчиндэх гэмт хэргийн хохирогчдын гурван хүн тутмын хоёр нь хүүхэд байна гэдэг мэдээлэл бий.
Энэ төрлийн гэмт хэрэгт шүүхээс сүүлийн 2 жил 432 хүнд ял ноогдуулсан. Энэ ялтны 22.7 хувь буюу 98 нь урьд нь ял шийтгүүлж байсан. Ял ноогдуулсан шүүхэд анализ хийхэд 2021 оны байдлаар 54.6 хувьд нь 10-15 жилийн хорих ял, 2022 онд 52.04 хувьд 10-15 жилийн хорих ял ноогдуулсан байна. Энэ нь Эрүүгийн хуулийн ялын бодлогыг чангаруулах шаардлагатайн нотолгоо болж байгаа юм.
2013-2023 онд бага насны хүүхдийг хүчиндэх, бусдыг санаатай алах, авлига албан тушаалын гэмт хэрэгт нийт 3879 хүн суллагдсан байна.
Суллагдсан хүмүүсийн 52.9 хувь нь хүнийг алах гэмт хэрэг үйлдсэн, 45.4 хувь нь хүчиндэх гэмт хэрэг, 13.7 хувь нь бага насны хүүхдийг хүчиндэх гэмт хэрэг үйлдсэн, 1.6 хувь нь авлига албан тушаалын хэрэг үйлдсэн байна.
Магадлангаар гарсан хүмүүсийн 77.5 хувь нь шүүгчийн захирамжаар, 12.2 хувь нь хорих ялын хугацаа дууссан, 5.6 хувь нь Эрүүгийн хуулийн тэгшитгэлд хамрагдсан, 2.6 хувь нь өвчний учраас, 0.9 хувь нь өршөөлд хамрагдаж, 0.6 хувь нь Улсын дээд шүүхийн тогтоолоор, 0.2 хувь нь Ерөнхийлөгчийн зарлигаар тус тус хорих ялаас хугацаанаас өмнө суллагдсан байна." гэлээ.
Мөн бага насны хүүхдийн Эрүүгийн хуульд байгаа насны хязгаарыг 14 байгааг 16 нас болгон нэмэгдүүлэхээр шийдвэрлэсэн байна. Ингэснээр 14-16 насны хүүхдүүдийн эсрэг үйлдэгдэж гэмт хэргийн ялын бодлого одоо Эрүүгийн хуульд байгаа 14 -өөс доош насны хүүхдүүдтэй адил болж байгаа юм. Энэ талаар тэрбээр "Хуульд хүчиндэх гэмт хэргийн шинжийг хийхдээ бэлгийн харьцаанд орж, хурьцал үйлдсэн үйлийг хурьцал үйлдээгүй ч бие эрхтэн, бусад газар хүрсэн завдалттай адилаар ял шийтгэдэг онцлогтой. Тийм учраас үүнийг хоёр тусад нь салгаж хурьцал үйлдсэн буюу дөхсөн үйлдлийг хүнд гэмт хэргийн ангилалд оруулж ялыг 1-5 жил байсныг 2-8 жил болгож нэмэгдүүллээ. Насны ангиллыг 0-14, 14-16, 16-18 нас болгож зааглаж байна. Учир нь бага насны хүүхэдтэй бэлгийн харьцаанд орсон үйлдлийг өөрөө зөвшөөрсөн, хүч хэрэглээгүй байсан ч хүчиндэх гэмт хэрэгт тооцдог. Энэ насны ангиллыг нарийн зааглахгүй бол өсвөр насны хүүхдүүд хайр сэтгэлийн үүднээс бэлгийн харьцаанд орвол хоёулаа бүх насаар хорих ял шийтгэгдэнэ. Ийм ял шийтгэлийн үр дагавар гардаг учраас насны ангилал ялгамжтай байдаг." гэв.
