Монголын Эрчим хүч геологи, уул уурхайн үйлдвэрчний эвлэлийн холбооноос тус салбарын ажилтан, мэргэжилтнүүдийн цалинг даруй нэмэх шаардлагатай байгааг цахим хуудсаараа дамжуулан мэдээллээ.
Үйлдвэрчний эвлэлийн зүгээс “Эрчим хүчний салбарын ажилтнуудын цалингийн өсөлт уул уурхайн салбарын цалингийн өсөлтөөс 2.8 дахин хоцорсон. Сүүлийн дарван жилийн хугацаанд ажилтнуудын нийгмийн асуудлыг шийдвэрлэх зардал 6.3, хамрагдах ажилтны тоо 5.8 дахин буураад байна. Эрчим хүчний салбарын ажилтнуудын анхдугаар зөвлөгөөнөөс гарсан санал, шаардлагын дагуу аравдугаар сарын 1-ний өдрөөс 20 хувиар, 2024 оны нэгдүгээр сарын 1-ний өдрөөс 30-50 хувиар цалин нэмэгдүүлэхийг шаардаж байна. Тэвчээрийн тог тасарлаа” хэмээжээ.
Тэгвэл эрчим хүчний салбарынхны хувьд сүүлийн жилүүдэд холбогдох яам, албан тушаалтанд шаардлагыг хүргүүлж, цалин хөлсийг нэмэхийг шаардсаар ирсэн билээ. Гэвч саяхан болсон Монголын эрчим хүчний салбарын ажилтнуудын улсын анхдугаар зөвлөгөөний үеэр Эрчим хүчний яамны Төрийн нарийн бичгийн дарга Н.Тавинбэх "Нарийн мэргэжил, ур чадвар, дадлага туршлага шаарддаг энэ салбарын хамт олон амьдралд хүрэлцэхүйц цалин хөлстэй байх хэрэгтэй. Ямар хэмжээнд нэмэх вэ гэдгийг нарийн тооцсон аргачлал алга байна. Энэ салбарт өнөөдрийн байдлаар цалин хөлс нэмэх санхүүгийн эх үүсвэр огт байхгүй байна" хэмээж байлаа.
