Нийтийн тээврийн парк шинэчлэлтийн хүрээнд хуучин автобус оруулж ирсэн гэх асуудал өнгөрсөн амралтын өдрүүдэд шуугиан дагууллаа. Иргэдийг бухимдуулсан энэ үйл явдлын улмаас Монгол Улсын сайд Ж.Сүхбаатар Ерөнхий сайдад албан тушаалаасаа огцрох хүсэлтээ өгчээ. Түүний хүсэлтийг хүлээж авах эсэх нь Ерөнхий сайдын бүрэн эрх мэдлийн асуудал юм.
Угтаа бол Ж.Сүхбаатар худалдан авалтад хамаарахгүй албан тушаалтан. Худалдан авах эрх Нийслэлийн Засаг дарга болон гүйцэтгэсэн хувийн хэвшил буюу "Тэнүүн Огоо" ХХК руу хамаарч буй. Гэхдээ өөрийнх нь түгжрэлийн эсрэг явуулж буй бодлогын хамгийн том шийдвэр нь бүтэлгүйтсэн тул хариуцлагаа хүлээх гэж байгаа нь энэ бололтой. Эх сурвалжийн мэдээлснээр "Тэнүүн Огоо" ХХК-ийн захирал А.Ганхуяг, Нийслэлийн худалдан авах ажиллагааны газрын дарга Б.Түмэнжаргал, тус газрын мэргэжилтэн Ш.Баярсүх нарыг Нийслэлийн 461-р ангид өчигдөр орой саатуулаад батлан даалтад гаргасан талаар эх сурвалж мэдээлсэн.
Өргөсийг нь авах гээд улам шигтгэсэн нэр бүхий улстөрийн албан тушаалтнууд эхнээсээ хариуцлагаа хүлээж, асуудлыг шийдэж дөнгөхгүйгээ мэдээд ажлаа өгөх хүсэлтээ Ерөнхий сайдад хүргүүлээд эхэллээ. Түгжрэл, утаа, авлигал, газар олголт, дээр нь жаахан бороо орох үед хотоороо живэхээ шахсан үерийн асуудал гээд энэ бүгд манай нийслэл хотын асуудал. Энэ асуудлуудыг "Намайг зургаахан сарын хугацаатай тавиад өгчих, зургаан сарын хугацаанд Улаанбаатарыг эмх цэгцэд нь оруулж чадахгүй бол би өөрөө ажлаа өгөөд явна" гэж хэлж байсан хотын дарга маань өдий 36 сарын нүүрийг үзэхэд муу нийслэл маань улам дордсон уу гэхээс дээрдлээ гэж хэлэх хотын иргэн нэг ч үгүй биз. Тэгэхээр том зургаар нь харж, хариуцлага хүлээх дээрээ тулбал асуудал хариуцсан сайдуудаараа туг тахиад, буруугаа тэдэнд тохоод өөрөө мундаг дарга болоод өнгөрөх биш ажлаа хийж чадаагүйтэйгээ эвлэрч, хариуцлагаа хүлээж, нийслэлчүүдээсээ уучлалт гуйгаад огцорвол наанадаж өөрийнх нь улстөрчийн цаашдын замналд, цаанадаж улс орны хөгжлийн илэрхийлэл болсон нийслэл хотын аврал болох буй за. Одоо бол цөхөрч, шантарсан иргэдийн Д.Сумъяабазар аваргаасаа ганц хүсэж буй зүйл бол тэр. Гэтэл Д.Сумъяабазар тэр талаар бодох нь бүү хэл түүний ажилд шүүмжлэл хэлсэн ИТХ-ын төлөөлөгчдийг "Чам шиг юмаар ажлаа заалгахгүй, муу ажлаад гэх юм байхгүй, ажлаа хангалттай сайн хийж байгаа" гэх зэргээр загнаж аварга зангаа цухуйлгасаар байгаа нь түүнийг ажлаа өгөх нь байтугай өөрийгөө сайн ажиллаж байгаад гүнээ итгэлтэй байгааг тод илтгэнэ.
