Монголбанкны Ерөнхийлөгч Б.Лхагвасүрэн даваа гаригт Төрөөс мөнгөний бодлогын талаар 2024 онд баримтлах үндсэн чиглэлийн төслийг УИХ-ын дарга Г.Занданшатарт өргөн мэдүүлсэн. УИХ-ын намрын чуулганаар ирэх оны мөнгөний бодлогын чиглэлийг хэлэлцэж, батална.
Төв банкнаас ирэх онд баримтлах мөнгөний бодлогын үндсэн чиглэлд инфляцыг тогтворжуулах замаар дунд хугацааны эдийн засгийн тогтвортой өсөлтийг дэмжих. Инфляцыг дунд хугацаанд 6+/-2 хувийн орчимд тогтворжуулахад чиглэсэн мөнгөний бодлогыг хэрэгжүүлэх.
Гадаадын банкны бие даасан салбар, нэгжийг дотоодын санхүүгийн салбарт нэвтрүүлэх, ногоон зээлийн үр дүнг хэмжих, тайлагнах, баталгаажуулах нэгдсэн системийг хөгжүүлэх, хил дамнасан худалдааны цахим төлбөр, тооцоо болон финтект суурилсан шинэ бүтээгдэхүүн, үйлчилгээний хөгжлийг дэмжих зэрэгт төвлөрч ажиллахаар тусгасан талаар мэдээлсэн.
Дээрх мэдээллээс гадаадын банкны бие даасан салбар, нэгжийг дотоодын санхүүгийн салбарт нэвтрүүлэх асуудал хөндөгдсөн нь анхаарал татаж байгаа юм. Ерөнхий сайд Л.Оюун-Эрдэнэ өнгөрсөн долдугаар сард “Монголын Эдийн засгийн чуулган 2023”-д оролцох үеэрээ гадаадын томоохон банк, санхүүгийн байгууллагуудад хандан Монгол Улсад салбараа нээхийг урьж байв.
Гадаадын банкны салбарыг оруулж ирэх замаар Монголын банк, санхүүгийн салбарт өрсөлдөөн бий болгох сэдэв олон жилийн турш яригдсан. Гэвч дотоодын банкуудын эсэргүүцэл болон улс төрийн дэмжлэгээс шалтгаалан ажил хэрэг болж чадалгүй явж ирсэн. Гадаадын банк орж ирснээр Монголын банкны систем, эдийн засагт хяналтаа тогтооно гэх асуудал хамгийн ихээр хөндөгддөг.
Харин энэ онд Банкны тухай хуульд оруулсан нэмэлт, өөрчлөлтөөр гадаадын банкны нэгж байгуулах, бүртгэхэд тавигдах нөхцөл, шаардлагыг Монголбанк тогтоохоор заасан.
Тэгвэл Төвбанк гадаадын банкны салбар, нэгжийг дотоодын санхүүгийн салбарт нэвтрүүлэхтэй холбоотой журмыг баталж дууссан. Хамгийн түрүүнд Хятадын “Bank of China” Монгол Улсад салбараа нээх асуудал яригдаж байгаа бөгөөд эрх зүйн зохицуулалтууд дээр ажиллаж эхэлсэн байна.
Хятадын төрийн өмчит “Bank of China” нь нийт хөрөнгийн хэмжээгээр дэлхийд эхний дөрөвт, зах зээлийн үнэлгээгээр эхний 10-т ордог, манай урд хөршийн хамгийн том арилжааны банкуудын нэг юм. Тус банк нь 2013 онд Улаанбаатар хотод төлөөлөгчийн газраа нээсэн бөгөөд Монголын хэд хэдэн арилжааны банктай стратегийн хамтын ажиллагааны санамж бичиг байгуулсан байдаг. Түүнчлэн Хятадын хамгийн том банк болох “Industrial and Commercial Bank of China” 2017 онд Улаанбаатар хотод төлөөлөгчийн газраа нээсэн.
