Эрчим хүчний Дэд сайд өнгөрсөн өвөл ярьж байсан зүйлээ энэ жил ч бас давтаж зогсоно. Тодруулбал тэрбээр, эрчим хүчний салбар өвөлд бэлэн эсэх талаар хэвлэлд ярилцлага өгөхдөө дараах зүйлийг хэлжээ.
"Ирэх өвөл эрчим хүчний гэмтэл саатал гарвал орлуулах нөөцгүй. Дотоодын эх үүсвэрүүд ямар нэгэн нөөц тоноглолгүйгээр бүрэн хүчин чадлаараа ажиллаж байна. Ямар нэгэн гэмтэл саатал гарвал хэрэглээг хязгаарлах эрсдэлтэй нөхцөл байдалд ажиллаж байна" гэсэн байна.
Н.Тавинбэх өнгөрсөн жил Эрчим хүчний сайд байхдаа “Эрчим хүчний салбар дутагдалтай учраас 2022-2023 оны өвөл хүнд нөхцөл байдал хүрнэ” гэсэн. Өөрөөр хэлбэл, эрчим хүч, дулаан тасалдана. Тог, дулаан тасалдвал хот хөлдөх эрсдэлтэй гэхчлэн хэлж байсан.
Улмаар эрчим хүчний салбарын мэргэжилтнүүд ч лаа, шүдэнзээ бэлдээрэй гэж ил цагаанаар сануулж байв. Өнгөрсөн жилийн эрсдэлтэй нөхцөл байдал энэ жил ч дээрдээгүй, хэвээрээ байгаа ажээ.
Эрчим хүчний салбар 20 хувийн нөөц чадалтай байх ёстой. Гэвч манай эрчим хүчний салбар 20 хувийн дутагдалтай явдаг байдал ороод удаж буй билээ.
