Монголын кино урлагийн салбарт тодоор үлдсэн хэд хэдэн кино байдаг билээ. Тухайлбал, 1961 оноос эхэлж Герман улстай хамтран "Алтан өргөө", "Ховдын гай", “Бушхүүгийн үлгэр” зэрэг үлгэрийн киног бүтээж байжээ. Тэгвэл тэртээ 1979 онд бүтээгдсэн Бушхүүгийн үлгэрээс хойш анх удаа буюу 44 жилийн дараа “Бэрх шагай” үлгэрийн/FANTASY/ төрлийн киног олон нийтийн хүртээл болгоход бэлэн болжээ.
Энэхүү кино багийнхан хүүхэд залуучуудад монгол аман үлгэр, зүйр үг зэрэг өв соёлыг илүү сонирхолтой шинэлэг байдлаар хүргэх зорилготой хийжээ. Ингэхдээ киноны санааг мэргэжлийн тусгай эффектийн нүүр хувиргагч Г.Хос-Эрдэнэ гаргасан байна. Түүний хувьд иргэдийн мэдэх "Халуун зүрх", "Биеийн ганц толгой", "Хүүхэлдэй", "Атганд үлдсэн эрдэнэ" зэрэг уран сайхны кино болон "Яг түүн шиг" шоуд ажиллаж байсан туршлагатай нэгэн юм. Харин киноны ерөнхий продюсероор "Альтернатив" эмнэлгийн ерөнхий захирал Б.Дамдинсүрэн ажиллаж байгаа аж.
Түүнчлэн олон улсад кино урлагийн чиглэлийн мэргэжлээр суралцсан уран бүтээлчид сурсан туршлагаа энэхүү киног бүтээхэд ашигласан байна. 2020 оны нэгдүгээр сарын 1-нээс эхэлсэн киноны ажил өдгөө эвлүүлгийн ажил дуусаж, графикийн үе шатад явж буй.
"Бэрх шагай" үлгэрийн МУСК нь есдүгээр сарын 27-нд нээлтээ хийх бөгөөд кино театруудаар цаг 30 минутын хугацаатай гарах бол IPTV-ээс үзвэл хоёр цагийн хугацаатай байх аж.
