Шударга өрсөлдөөн хэрэглэгчийн төлөө газраас өчигдөр мэдээлэл хийсэн. Ингэхдээ банкуудыг үндэслэлгүйгээр зээл судалсны 1 хувийн төлбөрийг иргэдээс авснаа эргүүлэн төлөх шүүхийн шийдвэрийн талаар мэдээлэл өгсөн.
ШӨХТГ-ын дарга С.Ням-эрдэнэ: Улсын Дээд шүүх Захиргааны хэргийн шүүхээс гаргасан шийдвэрийг хүлээн зөвшөөрч хэлэлцэх шаардлагагүй гэж үзсэн. Иймд банкууд иргэдээс үндэслэлгүйгээр зээл судалсны нэг хувийн шимтгэл авснаа эргүүлэн төлж, иргэдийг хохиролгүй болгох ёстой. Арилжааны банкууд аравдугаар сарын 11 хүртэл шүүхийн шийдвэрийг сайн дураар биелүүлэх үүрэгтэй. Энэ хугацаанд арилжааны банкууд шүүхийн шийдвэрийг биелүүлээгүй тохиолдолд үндэслэлгүй авсан ипотекийн зээлийн 1 хувийг иргэдэд хүчээр төлүүлэх шаардлага үүснэ. Одоогоор шүүхийн шийдвэрийг сайн дураар биелүүлж, иргэдээс авсан 1 хувийн шимтгэлээ буцаан төлсөн банк байхгүй байна. Тиймээс хэрэглэгчдийнхээ эрхийг хамгаалахын төлөө манай байгууллага тууштай ажиллана.
ШӨХТГ-аас тус хэрэгт өнөөдрийг хүртэл хамтран ажиллаж, эрх зүйн туслалцаа, өмгөөллийн үйлчилгээ үзүүлсэн өмгөөлөгчидтэй хамтын ажиллагаагаа өргөжүүлж, хамтран ажиллах гэрээг өнгөрсөн пүрэв гаригт албан ёсоор байгууллаа.
Монголын өмгөөлөгчдийн холбооны өмгөөлөгч н.Ялалт, н.Цэнгэл, н.Чинбат нартай үргэлжлүүлэн ажиллана. Банкууд 30 хоногийн хугацаанд шүүхийн шийдвэрийг сайн дураар хэрэгжүүлэх, хэрэглэгчдэд үндэслэлгүйгээр шимтгэл ногдуулсан бол буцаан олгох ёстой.
Банкуудаас олгож байгаа бүх төрлийн зээлийн шимтгэл үндэслэлтэй тогтоож байгаа эсэх асуудалд дараа дараагийн төлөвлөгөөт хяналт шалгалтуудыг хийхээр төлөвлөж байна. Ер нь дээрх чиглэлээр хэрэглэгчдийг хохироосон асуудлууд маш их гарч байна. Манай хэрэглэгчдийн мэдээлэл хүлээн авах 115-д ирж байгаа гомдол саналын дийлэнх нь банкны үйл ажиллагаа бөгөөд банкны үйлчилгээ, шимтгэлтэй холбоотой мэдээллүүд зонхилж байгаа учраас энэ асуудлыг орхихгүй, системтэйгээр цааш үргэлжлүүлнэ гэлээ.
Нэг хувийн шимтгэлтэй холбоотой асуудлаар Монголын банкны холбооноос мэдэгдэл гаргасан.
