Цаг уур, орчны шинжилгээний газраас мэдээлснээр есдүгээр сарын эхний 10 хоног олон жилийн дундажтай харьцуулбал ихэнх нутагт дунджаас 1.4-12.2 градусаар дулаан байжээ.
Өнөөдөр Архангайн нутаг, Булганы өмнөд хэсгээр их бороо орно. Төвийн аймгуудын ихэнх нутгаар ахиухан хэмжээний бороо, уулаараа нойтон цас орж, нутгийн хойд хэсгээр сэрүүсэхийг цаг уурын байгууллагаас анхаарууллаа.
Цаг уур, орчны шинжилгээний газраас танилцуулсан цаг агаарын мэдээг хэрхэн ойлгох тухай мэдээллийг хүргэж байна.
Цаг агаарын хэмжигдэхүүнд дараах үзэгдлүүд багтана
- Үүлшил
- Хур тунадас
- Салхины хурд, чиглэл
- Агаарын хамгийн их бага температур
Цаг хугацааг илэрхийлэх хэллэгүүд
- Өнөө шөнө
- Маргааш
- Өнөөдөр
- Шөнөдөө
- Өдөртөө
- Өглөөгүүр
- Үдээс өмнө
- Үдээс хойш
- Оройдоо
Газар нутгийг засаг захиргааны нэгж болон газарзүйн байрлалаар нь ялган бичдэг
Баруун, төв, говь, зүүн аймгуудын нутгаар гэж зааж дараах хэллэгүүдээр зааглан хэлдэг байна.
Тухайн бүс нутгийн зүүн, баруун, хойд, өмнөд хэсгээр
Эсвэл нутгийн зүүн хагаст, баруун хагаст, хойд хагаст, өмнөд хагаст
Хэрэв дээрх байдлаар тодорхой ангилж ялгах боломжгүй бол "ихэнх нутгаар", эсвэл "нутгийн ихэнх хэсгээр" гэж зааж өгнө.
- Ихэнх нутгаар гэдэг нь манай орны нийт нутгийн 70%-д тухайн үзэгдэл ажиглагдана гэсэн үг.
- Зарим хэсгээр буюу зарим газраар гэвэл тухайн үзэгдэл 30%-д ажиглагдана гэж ойлгож болох аж.
Хагас хоногт үүлшлийн хэмжээ ихээхэн өөрчлөгдөхөөр бол "үүлшинэ, үүл багасна" гэдэг
- Цэлмэг- Нийт үүлний (Бүх мандлын үүл) хоёр баллаас бага
- Багавтар үүлтэй- Дээд мандлын 1-8 баллын үүл, доод болон дунд мандлын 3 хүртэлх баллын үүл
- Солигдмол үүлтэй- 1-3 баллаас 4-7 балл хүртэлх доод, дунд мандлын үүлтэй болж өөрчлөгдөх эсвэл 8 баллаас 3 балл хүртэл үүлтэй болж багасах зэрэг хагас хоногийн хугацаанд хоёроос дээш удаа өөрчлөгдөх бол
Мөн хагас хоногт үүлшлийн хэмжээ ихээхэн өөрчлөгдөхөөр бол үүлшинэ, үүл багасна гэж мэдээлдэг.
Хагас хоногт гурван цагаас богино хур тунадас орохоор бол "түр зуур" орно гэнэ
Хур тунадасны төлөв байдалд ерөнхийд нь бороо, цас, хур тунадас гэсэн нэр томьёог хэрэглэдэг.
Үргэлжлэх хугацааг нь заахдаа:
- Үе, үе- Хоёр ба түүнээс олон удаа тасалдаж орох үед
- Түр зуур- Хагас хоногт гурван цагаас богино орохоор бол
- Үргэлжлэн орно- 3-12 цаг үргэлжлэх бол
- Зүсэрч орно- 12 цагаас дээш хугацаагаар орох
Салхины чиглэл болон хурдыг мэдээлэхдээ салхины чиглэлийг дөрвөн зүгээс хаанаас салхилж байгаагаар нь заана.
Хагас хоногт салхины зүг хурд өөрчлөгдөх бол хугацааг зааж "багасна" эсвэл "ширүүснэ" гэсэн нэр томьёог хэрэглэдэг.
Температурын өөрчлөлт нь 20 градусаар буурахаар бол "эрс хүйтэрнэ" гэдэг
Урьдчилсан мэдээнд агаарын температурын шөнийн хамгийн бага, өдрийн хамгийн их утгыг мэдээлдэг.
Температурын гаж явцыг заахдаа "дулаарч" эсвэл "хүйтэрч" гэсэн нэр томьёог хэрэглэдэг.
Температурын өөрчлөлт нь 20 градусаар буурахаар бол "эрс хүйтэрнэ" гэсэн нэр томьёог хэрэглэдэг юм байна.
Эх сурвалж: Цаг, Уур орчны шинжилгээний газар
