ХЗДХ-ийн Төрийн нарийн бичгийн дарга, Үндэсний баяр наадмыг зохион байгуулах хорооны бөхийн салбар хорооны дарга П.Сайнзориг допингийн асуудлаар зарим мэдээллийг сэтгүүлчдэд өглөө.
-Улсын арслан М.Бадарч допингийн шинжилгээнд эргэлзэж буйгаа өөрийн сошиал хуудсаар дамжуулан илэрхийлээд байгаа. Энэ талаар таны зүгээс ямар тайлбар хэлэх вэ?
-Бөхчүүд өөрөө өөрсдийнхөө асуудлыг, хариуцлагыг хүлээж сурмаар байна. Ийм ёсзүйгүй, аль нэг байгууллагыг буруутгадаг, үүндээ ард иргэдийг талцуулж хуваадаг зүйл байж болохгүй. Үнэхээр шээс холилдсон асуудал байвал баримттай гаргаж ирээд тавих хэрэгтэй. Сүүлийн хоёр жил би энэ асуудлыг хариуцаад явж байна. Ийм зүйл байх ямар ч боломжгүй. АТГ, Цагдаа, Тагнуул, Үндэсний бөхийн холбоо өөрсдөө допингийн шинжилгээ авах процесст оролцсон. Одоо хэдүүлээ жудагтай баймаар байна. Түрүүлж амжилтад хүрэхийн тулд янз бүрийн башир арга хэрэглээд, илчлэгдээд эхлэхээр иргэдийн худлаа мэдээллээр талцуулж, нутаг усаараа хуваагддаг зүйл одоо явахгүй. Бөхчүүд, тамирчид үүнийгээ болих хэрэгтэй.
- Допингийн эсрэг үндэсний төвийн үйл ажиллагаа нь олон эргэлзээ төрүүлээд байгаа юм биш үү?
-Допингийн эсрэг үндэсний төвийн үйл ажиллагааг би дүгнэдэг хүн биш. Үнэхээр ил тод болгох хэрэгтэй. Гэхдээ тусдаа ярь. 16 харваачийн асуудал цуг явсан. Ямар ч асуудалгүй ирсэн. Асуудалтай хүний шинжилгээг үлдээчихдэг юм. Түүнээс зориудаар өөрчилсөн, наадмын өмнө ийм асуудал яригдсан гэж үлгэр шиг юм ярихаа боль. Төрийн наадам гэдэг татвар төлөгчдийн мөнгөөр зохион байгуулдаг зүйл. Төрийн наадмыг будилуулж байгаа тамирчин ийм ёс зүйгүй юм ярьж болохгүй
-М.Бадарч арслан өөрөө энэ талаар ямар нэгэн тайлбар өгсөн үү?
- Олон зүйл ярьж байсан. Бэртэл гэмтэл гээд. Өөрөө хэвлэлээр элдэв мэдээлэл цацаад байдаг юм уу. Тамирчин өөрөө энэ асуудлаа ил тод ярих хэрэгтэй. Хэн шударга, шударга бусаа ярих ёстой. Би яагаад эгдүүцээд байна вэ гэхээр үнэхээр ёс зүй алга. Нүүр тулахаар нэг юм ярина, хэвлэлээр шал өөр юм ярина.
-Шинжилгээний процесс нь эргээд гомдол үүсгэх нөхцөл байдалд хүргээд байгаа юм биш үү?
-Байгаа төсөв, мөнгөндөө тааруулаад шинжилгээ хийлгэдэг. Цаашдаа Допингийн үндэсний төв энэ шинжилгээг авах нь зөв үү. Биеийн тамир спортын хуульд заасны дагуу энэ асуудлыг ярих нь зөв. Яг үнэндээ өөрсдөө допингийн шинжилгээ өгч үзээгүй хүмүүс их юм ярьж байна. Асуудлаа мэдэж байгаа хүмүүс төөрүүлэхийн тулд бас элдэв зүйл ярьж байна.
