Хотын даргын захирамжаар үерийн усны голдирлыг хашиж барьсан гэх "Aqua garden" хотхоны барилгыг нураахаар болсон. Харин Хотын даргын орлогч Ж.Сандагсүрэн тус барилгад байр захиалсан хохирогчдын мөнгийг төсвөөс гаргана гэх мэдээллийг өгсөн нь олны анхаарлыг татаж мөн нэлээдгүй шүүмжлэлд өртсөн. Хохирлын мөнгийг хэн гаргах тал дээр Засгийн Газрын нэр бүхий хүмүүс байр сууриа илэрхийлсээр байна.
Тэгвэл энэ талаар ЗГХЭГ-ын дарга Д.Амарбаясгалангаас тодруулахад "Сангийн сайд байр сууриа илэрхийлсэн. Төсвөөс хохирогчдын мөнгийг гаргах асуудал яригдаагүй, боломжгүй. Шүүх, хууль хяналтын байгууллага шийдвэрлэж, дүгнэлт гаргах ёстой. Тэр шийдвэр гаргасан буруутай этгээдүүд нь төлнө үү гэхээс Засгийн газар төлнө гэсэн шийдвэр гаргах боломжгүй. Тэгэх шаардлага ч байхгүй. Ер нь, Улаанбаатар хот холбогдох шийдвэр гаргасан дарга нар хариуцлага яригдаж, тайлбар мэдээллээ өгөх ёстой" гэх тайлбарыг өгчээ.
