Ардчилсан намын дарга Л.Гантөмөр, тэргүүн дэд дарга С.Баярцогт болон дэд дарга нар өнөөдөр Төрийн ордонд мэдээлэл хийж байна.
АН-ын дарга Л.Гантөмөр “ Ардчилсан нам Үндэсний бодлогын хорооны хурлаа хийж, тэргүүн дэд дарга болон дэд дарга нараа томилсон. Мөн улс төрийн зөвлөлөө байгуулсан. Улс төрийн зөвлөлд 22 гишүүнийг нэр дэвшүүлэн баталсан. Өнөөдрөөс улс төрийн зөвлөл намын өдөр тутмын үйл ажиллагааны шийдвэрээ гаргаж ажиллах юм. Дотоодын сонгуулийн хороогоо шинэчилж, намын анхан шатны байгууллагуудын сонгуулийг зохион байгуулах дүрмээ баталсан. АН-ын ҮБХ нь үндсэндээ хоёр зүйл дээр төвлөрч хуралдсан юм. АН-ын удирдлагууд гишүүдээ сонсох аян зохион байгуулж, өнгөрсөн хавраас орон нутагт ажилласан. Гишүүдийн зүгээс нэгдмэл, эв нэгдэлтэй байх тухай санал хамгийн ихээр тавьж байсан. Хоёрдугаарт, АН цусаа сэлбэх хэрэгтэй, удирдлагын түвшинд шинэчлэл явуулах хэрэгтэй. Дараа үеийн улс төрчдийг гаргаж ирэх зайлшгүй шаардлагатай болжээ гэдэг саналыг маш хүчтэй илэрхийлж байлаа.
Гуравдугаарт, Төрийн хүнд сурталтай холбоотойгоор төрийн бодлогын алдааг засах, шинэчлэх зүйлсийг яаралтай гаргаж, хэлэлцүүлэгт оруулахыг хүсч байгаа юм.
Ардчилсан намын 15 дэд даргаас 9 нь 1980-аад оны залуус байгаа. Тэд бол сонгуульд АН-ын авч орох хүмүүс юм. Намын дэд дарга нарын хариуцах ажлууд маш тодорхой болсон.
Жишээ нь, С.Баярцогт даргын хувьд, Сонгуулийн кампанит ажлыг удирдах чиглэлд тодорхой ажлууд хийнэ. Улстөрийн зөвлөлийн хурлыг даргалж явуулдаг болно. Мөн гадаад харилцаагаа хариуцаж ажиллана.
Бид гишүүдээ сонсох аянаа өндөрлөж, тэднээс гарсан саналуудыг ажил хэрэг болгох тал дээр төвлөрч ажиллана. Дараагийн төлөвлөгөө нь ард түмнээ сонсох юм.
Тэргүүн дэд дарга С.Баярцогт “ Үндэсний бодлогын хороо маань 504 гишүүнтэй болсон. Тэднээс 50 гаруй нь улс төрийн зөвлөлд ажиллана. Засгийн газрын бүтэцтэй уялдуулсан 22 гишүүн сонгогдсон. Энэ бүтэц бол АН-ын сонгуулийн мөрийн хөтөлбөр, үйл ажиллагааны стратегийг боловсруулж, бодлогын түвшинд шуурхай удирдлагаар хангаж ажиллах юм. Намын дүрмээр дарга улс төрийн зөвлөлийг удирдах ёстой. Даргын зүгээс та ажлыг ахалж, хурал даргалаад яваач гэсэн санал тавьсан. АН энэ удаагийн өөрчлөлтөөр Ардчиллын хоёр дахь давалгааг эхлүүлж байна. Шинэ үеийн төлөөлөл орж ирж байна. Манай анхдагчид 2024 оны сонгуулиар байр сууриа хоёр дахь үеийнхэндээ шилжүүлж байгаа шилжилтийн үе. Намын зүгээс Ардчиллын дахин сэргэлтийн үе гэж нэрлээд байна. Нэг нам хэт үнэмлэхүй олноор хоёр сонгуулийн хугацаанд засгийн эрх барьж байгаа тохиолдол сүүлийн30 гаруй жилд 2016,2020 оны сонгуулийн дүнгээр гарлаа. Тиймээс АН сүүлийн 7 жилийн ажилдаа маш сайн анализ дүгнэлт хийсэн. Шинэчлэгдэж байгаа, шинэ АН-ын талаар бид ярих болно” гэлээ.
