Чингэлтэй дүүрэгт орон сууцны нэг м.кв талбайн дундаж үнэ 4.1 сая төгрөг буюу хамгийн өндөр байв.
Үл хөдлөх хөрөнгө зуучлалын байгууллагууд 2023 оны эхний хагас жилд 707.6 мянган м.кв талбай бүхий үл хөдлөх хөрөнгийг 992 тэрбум төгрөгөөр худалдан борлуулсан болохыг Санхүүгийн зохицуулах хороо мэдээллээ. Өмнөх оны мөн үетэй харьцуулахад хэлцлийн тоо 1.3 дахин, үнийн дүн 1.6 дахин өссөн байна.
Мөн 232.1 мянган м.кв талбай бүхий үл хөдлөх хөрөнгийг 66.3 тэрбум төгрөгөөр түрээслэх, түрээслүүлэх үйл ажиллагаа явуулсан болохоо тайлагнасан байна.
Үл хөдлөх хөрөнгө зуучлалын чиглэлээр энэ оны эхний хагас жилд 311 байгууллага Санхүүгийн зохицуулах хороонд бүртгэлтэй байгаа нь өмнөх оноос 9.5 хувиар өссөн үзүүлэлттэй боллоо. Эдгээр зуучлалын компаниудын худалдан борлуулсан үл хөдлөх хөрөнгийн шимтгэлийн орлого 22.2 тэрбум төгрөг хүрчээ.
Түүнчлэн 2023 оны эхний хагас жилд зуучлалын байгууллагуудын хувь нийлүүлсэн хөрөнгийн хэмжээ 1.1 дахин, хуримтлагдсан ашгийн хэмжээ 2.4 дахин, нийт хөрөнгийн хэмжээ 1.9 дахин өссөн байна.
Үл хөдлөх хөрөнгө зуучлагч байгууллагуудаас ирүүлсэн тайлангаас харахад Чингэлтэй дүүрэгт орон сууцны нэг м.кв талбайн үнэ дунджаар 4.1 сая төгрөг буюу хамгийн өндөр, Сонгинохайрхан дүүрэгт 2.43 сая төгрөг буюу хамгийн бага дүнтэй борлуулагджээ.
