БНАСАУ-ын удирдагч Ким Чен Ун ойрын өдрүүдэд Орост ирж, Ерөнхийлөгч Владимир Путинтэй уулзаж, Москвад зэвсэг нийлүүлэх асуудлыг хэлэлцэхээр төлөвлөж байна гэж Вашингтон мэдэгдлээ.
Цагаан ордон өнгөрсөн долоо хоногт Орос улс армиа сум хэрэгслээр хангахын тулд Хойд Солонгостой нууц хэлэлцээ хийж байна гэж мэдэгдсэн.
Цагаан ордны Үндэсний аюулгүй байдлын зөвлөлийн хэвлэлийн төлөөлөгч Адриен Ватсон “Бид өмнө нь анхааруулж байсанчлан Орос, БНАСАУ-ын хооронд зэвсэг нийлүүлэх хэлэлцээр идэвхтэй урагшилж байна" гэжээ.
Даваа гарагт удахгүй болох айлчлалын талаар Нью Йорк Таймс сонин хамгийн түрүүнд мэдээлэв. Тэнд бичсэнээр гадаад орнуудад бараг аялдаггүй Ким Чен Ун хуягласан галт тэргээрээ Владивостокт очиж, ирэх есдүгээр сарын 10-13-нд болох Дорнын эдийн засгийн форумын үеэр Путинтэй уулзах бололтой гэжээ.
Тагнуулын эх сурвалж “Путин Кимтэй ярилцаж, Орост их бууны сум, танк эсэргүүцэх пуужин нийлүүлэхийг, харин Ким Хойд Солонгост хиймэл дагуулын дэвшилтэт технологи, цөмийн шумбагч онгоц нийлүүлэхийг Оросоос хүсч байгаа” гэж мэдэгджээ.
Түүнчлэн Хойд Солонгос бас хүнсний тусламж авах хүсэлтэй байгаа аж.
ОХУ-ын Батлан хамгаалахын сайд Сергей Шойгу саяхан айлчлах үеэрээ Пхеньяныг Орост сум нийлүүлэхийг ятгасангэж Адриен Ватсон сэтгүүлчдэд мэдэгдэв.
Путин, Ким нар хоёр талын хамтын ажиллагааг өргөжүүлэх талаар харилцан захидал солилцсоныг тэрээр мөн дурсав.
Ватсон хэрэв зэвсэг нийлүүлбэл шинэ хориг арга хэмжээ авах боломжтойг анхааруулж, "Бид БНАСАУ-ыг Оростой зэвсгийн хэлэлцээрээ зогсоож, Орост зэвсэг нийлүүлэхгүй, худалдахгүй гэсэн олон нийтийн амлалтаа биелүүлэхийг БНАСАУ-д уриалж байна" гэжээ.
Эх сурвалж: ВВС
