Зам тээврийн хөгжлийн сайд С.Бямбацогтын гаргасан буруу шийдвэрийн улмаас Драгон төвд үйл ажиллагаа явуулдаг 2000 түрээслэгчид болон 2000 тээвэрчдийн амьдрал хүнд байдалд орсон талаар түрээслэгчдийн төлөөлөл мэдээлэл хийлээ. Тэд АТҮТ-ийн хоёр байршил хоёулаа Номин Холдинг компанийн газар дээр очиж, сард 77 сая төгрөгийн түрээс төлөгдөж байгаа нь ашиг сонирхлын зөрчилтэй гэж үзэж С.Бямбацогт сайдыг АТГ-т шалгуулна гэсэн юм.
Драгон төвийг 1500 метр квадрат талбайг АТҮТ өөрийн мөнгөөр худалдаад авчихсан байсан. Одоо эзэнгүй хоосон байж байна.
Түрээслэгчид мэдээлэлдээ, "Бид авто вокзалыг дагаж жижиг бизнес эрхэлж амьдралаа авч явдаг. Гэтэл бидэнд сануулалгүй гэнэт л огцом шийдвэрийг С.Бямбацогт сайд гаргасан. Дээрээс нь энэ бол хууль бус шийдвэр байсан. Яагаад гэхээр 2001 онд Тээврийн товчооны тендерийг Драгон Холдинг компани авч байсан түүхтэй. Үүнээс хойш хөдөө орон нутгийн тээврийн үйлчилгээ Драгон төвд байрлаж байсан. Гэтэл С.Бямбацогт сайд огт тендер зарлалгүй, шууд нэг л өглөө Номин агуулах руу нүүлгэх шийдвэр гаргасан. Өөрийнхөө доор ажилладаг АТҮТ-ийн Б.Гүрсоронзон даргыг шахаанд оруулж ийм шийдвэр гаргуулсан. Өөрөө үүнийг тайлбарлахдаа би огт оролцоогүй гэдэг.
Бид яагаад энд ирэх болсон гэхээр өчигдөр хэвлэл мэдээллийн сайтаар Б.Гүрсоронзон даргын хоёр төрлийн гэрээ гарч ирсэн.
Эхний гэрээ нь Зам тээврийн яамны хажууд байрладаг өөрийн гэсэн төрийн өмчийн газартай байсан АТҮТ-ийг Номин реалтор компанийн өөрийн эзэмшлийн байранд сарын 47 сая 300 мянган төгрөгийн түрээстэйгээр оруулсан байна.
Хоёр дахь гэрээ нь Драгон төв дээр байрлаж байсан Авто тээврийн төвийн Номин агуулах руу нүүлгэх гэрээ. Энэ нь нэг сарын 30 сая төгрөгийн түрээс төлөх гэрээ байсан.
АТҮТ-ийн хоёр байршил хоёулаа Номингийн газар дээр очиж, түрээс төлөгдөж байна. Сард 77 сая төгрөг, жилд нэг тэрбум төгрөгийг Номингийн халаасанд хийж өгөхөөр С.Бямбацогт сайд зохицуулж өгсөн байна.
Нэг тэрбум төгрөг улсад илүү гараад байгаа мөнгө юм уу. Үүгээр бид сургууль, цэцэрлэг барьж, хөгжлийн бэрхшээлтэй иргэддээ байр барьж өгч болно. Гэтэл энэ зүгээр л нэг компанийг дэмжсэн хэрэг болчихлоо.
Үнэндээ авто вокзал байргүй биш байртай байсан. Драгон дээр байрлаж байгаа 2 тэрбум төгрөгийн 1500 метр квадрат талбайг өөрийн мөнгөөр худалдаад авчихсан байсан. Одоо эзэнгүй хоосон байж байна.
АТҮТ байрлаж байсан хоёр давхар обьект хоосон байгаа. Хэл ам гараад ирэхээр цэцэрлэг оруулна гэж байна лээ.
Түгжрэлийг огт шийдээгүй. СХД-ийн хамгийн их түгжрэлтэй хэсэг бол 10 буудлын Номин агуулахын урд талын хоёр урсгалтай зам. Өмнө нь түгжирдэг байсан ч ганц цагдаа зохицуулаад гарчихдаг байсан бол одоо тэг зогсолт болдог болсныг түмэн мэдэж байгаа. Зургаан урсгалтай Драгон төвөөс яагаад нүүлгэх болсноо тайлбарлаж өгөөч ээ" гэлээ.
Автовакзалыг хоёр эгнээ замтай газарт нүүлгэснээр иргэд 20 минут явдаг газарт одоо 2 цаг болж ирж байна
СХД-ийн иргэн "Автовакзалыг хоёр эгнээ замтай газарт нүүлгэснээр иргэдийн эрх ашгийг хөндөж байна. Орбит, Тахилт, Нарангийн гол, Толгойтоос 20 минут яваад ирчихдэг байсан бол одоо 2 цаг болж байна. Ямар ч боломж, үндэслэлгүй газар, өөрийнхөө газрыг үнэд оруулах гэж авто вокзалыг нүүлгэж байна. Номингийн захирал Ш.Баярсайхан, С.Бямбацогт сайд хоёр Ховдынх гэсэн. Тийм биш юм бол ард түмнээ бодооч ээ.
Сарын 30 сая төгрөгийн түрээстэй газар нүүлгэх хэрэг байсан уу. Л.Оюун-Эрдэнэ сайд аа, энэ хэмнэлт мөн юм уу. Энэ шийдвэрээ эргэж харах цаг болжээ. Найзуудын хоорондох харьцаанаас болж иргэд ингэж хохирмооргүй байна. Дөрөв, таван цагдаа өдөр шөнөгүй ажиллаж байгаа ч түгжрэл буурахгүй, дийлэхгүй байна. Хэзээ байтлаа олон улсын терминал хоёр эгнээ зам дээр байсан юм" гэв.
