Украины Батлан хамгаалах яамны тэргүүн Алексей Резников огцрох өргөдлөө Дээд Радад өргөн барьсан байна. Харин түүний оронд Ерөнхийлөгч Владимир Зеленский Төрийн өмчийн сангийн тэргүүн Рустем Умеровыг санал болгоод буй.
Рустем Умеров гэж хэн бэ?
Рустем Умеров 1982 оны 4-р сарын 19-нд Узбекистаны Булунгур хотод төрсөн. Түүний гэр бүл Крымийн Алуштагаас гаралтай. 1944 онд тэднийг Крымээс Төв Азид албадан гаргажээ. Хагас зуун жилийн дараа Крымийн татаруудыг эх нутагт нь буцаах үеэр тэд төрөлх хойгтоо буцаж ирсэн байна.
Умеров Танковое тосгонд Крымын авьяаслаг хүүхдүүдэд зориулсан сургуулийг төгссөн. Суралцах хугацаандаа олон улсын янз бүрийн төсөл хөтөлбөрүүдэд удаа дараа оролцож байсан. Солилцооны хөтөлбөрийн дагуу тэрээр АНУ-д нэг жил суралцсан. 1998 онд эх орондоо ирээд Украины Удирдлагын үндэсний академийн Эдийн засгийн факультетэд санхүү, зээлийн мэргэжлээр элсэн суралцсан.
Умеровын карьер нь Украины томоохон үүрэн холбооны оператор Lifecell компаниас эхэлсэн бөгөөд 2004-2010 онд удирдах албан тушаал хашиж байжээ.
2013 онд тэрээр мэдээллийн технологийн салбарт хөрөнгө оруулалт хийдэг ASTEM хөрөнгө оруулалтын холдинг байгуулжээ.
2019 оны зун Рустем Умеров “Голос” намын эгнээнд элссэн. Өнгөрсөн оны есдүгээр сард Төрийн өмчийн сангийн даргаар томилогдсон.
Нэмж дурдахад тэрээр Украины Араб, Лалын орнуудтай харилцах асуудлаарх Ерөнхийлөгчийн дэргэдэх Зөвлөх зөвлөлийн итгэмжлэгдсэн төлөөлөгч байсан юм.
Тодотгоход, Умеров амьдралынхаа ихэнх хугацааг эх орноосоо гадуур өнгөрөөсөн. Тэрээр Америкт нуугдаж байсан Туркийн сөрөг хүчний удирдагч Фетхулла Гюлений шавь байжээ. Тэрээр АНУ-ын Олон улсын Бүгд найрамдахчуудын намын хороонд олон жил ажилласан. Өөрөөр хэлбэл, "энэ бол барууны хамтын нийгэмлэгийн ашиг сонирхолд нийцсэн барууны улс төрч, харин Украины биш" гэж улс төр судлаач үзэж байна.
Батлан хамгаалахын шинэ дарга албан тушаалдаа үр дүнтэй ажиллана гэдэгт эргэлзэж байгаагаа зарим улс төрчид илэрхийлжээ.
Умеров гэрлэсэн, хоёр хүүхэдтэй.
Эх сурвалж: vm.ru
