БОАЖЯ-наас Архангайн Цэнхэрийн рашаанд хийсэн хяналт, шалгалтын талаар мэдээлэл өглөө.
БОАЖЯ-ны Салбарын хяналтын дарга Б.Мөнхтогтох "Архангай аймгийн Цэнхэр сумын Алтан овоо багийн нутагт амралт, аялал жуулчлалын чиглэлээр үйл ажиллагаа явуулж байгаа байгууллага ААН-д хяналт шалгалт хийсэн. Улмаар хяналт шалгалтаар Цэнхэрийн халуун рашааны нөөцийг тогтоогоогүй байхад амралт, аялал жуулчлалд рашааны үйлчилгээг ашигласан. Мөн ус рашаан ашиглах цэгт усны тоолуур байрлуулаагүй зөрчил илэрсэн.
Түүнчлэн рашааны эрүүл ахуйн болон хязгаарлалтын бүсийг тогтоогоогүй, эрүүл ахуйн бүсийг хашаажуулж, хамгаалалтын бүсийг тэмдэгжүүлээгүй байсан. Мөн халуун усны голын онцгой хамгаалалтын бүсэд газар олголт хийсэн, барилга байгууламж барьсан зэрэг зөрчлүүд илэрсэн. Иймд 5 ААН байгууллагуудад Зөрчлийн тухай хуулийн 7.15 зүйлийн 1.4-т заасныг үндэслэн Архангай аймгийн БОАЖ газраас зөрчлийн хэрэг үүсгэн, хяналт шалгалтыг явуулж байгаа.
Өнгөрсөн сард манай алба 160 өргөдөл гомдлыг хүлээн авч ажилласан. Үүнээс бид 126 өргөдөл гомдлыг хуулийн хугацаанд шийдвэрлэсэн. Зөрчил шалган шийдвэрлэх ажиллагааны хүрээнд нийт 89 иргэн ААН-д 118 сая, 450 сая төгрөгийн торгууль шийтгэл ногдуулж байгаа" гэв.
