БОАЖЯ-наас цаг үеийн асуудлаар мэдээлэл хийлээ.
Тусгай хамгаалалттай газар нутгийн бодлого зохицуулалтын газрын дарга Н.Баатарцогт ”Тусгай хамгаалалтын газар нутгийн тухай хууль, газрын тухай хуулийн хүрээнд газраа хоёр жил дараалан ашиглаагүй, газрын төлбөрөө заасан хугацаанд нь төлөөгүй зэрэг асуудлаар иргэн хуулийн этгээдүүдийн газар эзэмших эрхийг цуцлах, хүчингүй болгох ажлуудыг хийж байна. Тухайн хамгаалалтын захиргаанаас хяналт шалгалт явуулж, сонсох ажиллагаа хийж, тухайн ажиллагааны үр дүнд БОАЖЯ-нд санал ирүүлсэн. Тухайн саналд үндэслэн шийдвэрийг гаргаж байна.
Сүүлийн үед усан сан бүхий газартай холбоотой асуудал нийтийн дунд ихээр яригдаж байна. Өмнө олгогдсон газар ашиглах эрхийн давхцалтай газруудыг шууд эрхийг цуцлах, хүчингүй болгох асуудлыг дэвшүүлсэн. Үүнд Засгийн газар болон БОАЖ-ын сайдын бодлого шууд чиглэл өгч ажиллаж байна.
ААН-үүд усан сан бүхий газар эзэмших эрхийн давхцалыг цуцлах асуудалд нээлттэй ажиллаж байгаа. Ямарваа нэгэн гомдол, санал маш бага гарч байна. Тиймээс иргэд энэ ажлын цаад утга учрыг ойлгож байна гэж үзлээ.
Мөн 2023 он гарсаар та бүхний сайн мэдэх Богдхан уулын дархан цаазат газар болоод Горхи, Тэрэлжийн байгалийн цогцолбор газар, Хөвсгөл нуурын тусгай хамгаалалттай газарт нийт 90 иргэн, хуулийн этгээдийн ашиглаж байсан газрын эрхийг цуцаллаа.
Түүнчлэн иргэд, хуулийн этгээдүүдийн газар ашиглах эрхийг цуцлах саналыг нээлттэй хүлээн авч, шийдвэрлэн ажиллаж байна
Цаашид хууль хэрэгжүүлэх ажлыг шат дараатайгаар тогтмол хийнэ. Монгол Улс 2030 он гэхэд нийт газар нутгийн 30 хувийг тусгай хамгаалалтад авахаар зорилт тавин ажиллаж байгаа. Энэ ажлын хүрээнд хамгаалахаас илүүтэйгээр хуулийг хэрэгжүүлэх ажлыг нэн тэргүүнд хийх болно. " гэлээ.
