БОАЖЯ-наас ан амьтны талаар хэрэгжүүлж байгаа арга хэмжээний талаар мэдээлэл өглөө.
Тус мэдээлэлд "2023 онд Архангай аймагт 10 толгой янгир,Орхон, Төв, Хэнтий, Архангай аймгуудад 40 тоо толгойн халиу буга, Архангай, Говь-Алтай, Дорнод, Орхон, Төв, Сүхбаатар, Хөвсгөл, Хэнтий аймгуудад 930 тоо толгой монгол тарвагыг сэргээн нутагшуулаад байна. Мөн Шивэрхадран, шөвгөр хоншоорт, зэвэг загасны үржүүлгийн ажлыг судалгааны хүрээлэн, ан амьтны мэргэжлийн байгууллагатай хамтран энэ жил орон нутагтай хамтран хийж гүйцэтгэлээ.
Монгол улсын Засгийн газраас 10 жилийн дараа амьтны экологи эдийн засгийн үнэлгээг шинэчлэн тогтоосон. Энэ жилээс эхлэн 42 шалгуур үзүүлэлтийг шинэчлэн тогтоосон.
Ан амьтныг барих зөвшөөрлийн хууль шинэчлэн батлагдсанаар ан амьтны зөвшөөрлийн тодорхой зөвшөөрлүүд орон нутаг руу шилжсэн. Зарим тусгай зориулалтын анг дуудлага худалдаагаар зохион байгуулахаар хуулиар зохицуулсан. Энэ жилийн тусгай зориулалтаар агнах барих агнуурын амьтны тоо толгойг тогтоох Засгийн газрын 444 дүгээр тогтоолоор угалз 93, тэх 160, халиу буга 100, бор гөрөөс 20, цагаан зээр 200, агнуурын шувуу 300, саарал чоно 30, зэрлэг гахай 10 хүртэл тоо толгойг агнуулахаар, тул загасыг 600 хүртэл тоо толгойг барьж, буцаан тавих, бусад загасыг 4000 хүртэл тоо толгойг барихаар тогтоосон.
Энэ жилийн тусгай зориулалтын ан дуудлага худалдаагаар зохион байгуулагдаж байгаатай холбоотойгоор орон нутгийн төсөвт 3.1 тэрбум төгрөгийг төвлөрүүлээд байна." гэсэн юм.
