Монгол Улсад албан ёсны төрийн айлчлал хийж буй Гэгээн ширээт улсын Төрийн тэргүүн, Пап Францисын уулзалтад оролцох, ойроос харах зорилгоор манай улсад католик шашинтай жуулчид их иржээ. Өчигдөр Монгол Улсын Ерөнхийлөгч У.Хүрэлсүх Гэгээн ширээт улсын Төрийн тэргүүн, Пап Францисыг Сүхбаатарын талбайд угтан авсан. Тухайн үед Сүхбаатарын талбайд маш олон хүн цугласан байлаа. Монгол Улсад төрийн айлчлал хийж буй хүмүүсийн угтах ёслолоос хамгийн их үзэгчтэй нь энэ байв.
Манай улсад 1300 гаруй католик шашинтан байдаг бол манай бүс нутагт 1.3 тэрбум католик шашинтан байдаг юм байна. Тиймээс Гэгээн ширээт улсын төрийн тэргүүний айлчлалтай холбогдуулан манай улс руу ирж буй жуулчдын тоо нэмэгджээ. Гэгээн ширээт улсын Төрийн тэргүүн, Пап Францис нэг улсад очиход тухайн улсад дор хаяж 10-400 сая ам.долларын орлого оруулдаг гэсэн тооцоо байдаг тухай албаны хүмүүс мэдээлсэн. Пап Францис энэ жил жил манай улсад ирэхээсээ өмнө Бүгд найрамдах ардчилсан Конго, Өмнөд Судан, Унгар, Португал улсад айлчилжээ. Энэ удаад манай улсад айлчилж байгааг нь тохиолдуулан Пап Францисыг ойроос харах, мөргөлийн үйл ажиллагаанд нь оролцох зорилгоор ОХУ, БНХАУ, Вьетнам, Филиппин, БНСУ-аас жуулчид иржээ. Жуулчдын төлөөлөл дараах байдлаар сэтгэгдлээ илэрхийлсэн байна.
ОХУ-ын иргэн Мария: -Бид гэгээн эцгийг харах гэж ОХУ-аас олуулаа ирсэн. Гэгээн эцэг Монгол Улсад ирж байгаа нь маш чухал үйл явдал. Монгол Улсад католик шашин хэр зэрэг дэлгэрсэн байдгийг сайн мэдэхгүй ч энд хүмүүс эрх чөлөөтэй байгаа нь сайхан юм. Ямар шашин шүтэх нь тухайн хүний эрх шүү дээ. Монгол Улс амар амгалан, энх тайван, ард иргэд нь халуун дулаан найрсаг юм.
ОХУ-ын иргэн Еркин: -Монголын ахан дүүс минь сайн сууж байна уу. Би Якутаас ирсэн. Гэгээн Папыг харсандаа үнэхээр баяртай байна. Монгол бол миний хайртай улс. Надад монгол хэл, зан заншил, дуу хөгжим, уламжулалт хоол хүнс үнэхээр таалагддаг.
Вьетнам улсын иргэн Терес Нгеун Май: -Вьетнамаас өөрийн биеэр ирж гэгээн эцгийг харж байгаадаа маш их баяртай байна. Монгол Улс үнэхээр тусгаар тогтносон, эрх чөлөөт улс юм.
Вьетнам улсын иргэн Терес Нгеун Май: -Вон Ти Там: -Монголд ирээд Пап Францисыг ойроос харсандаа үнэхээр жаргалтай байна. Түүнийг хараад нүднээс баярын нулимс цийлэгнэсэн. Бид түүнийг ойроос харахын тулд Вьетнамаас зорьж ирсэн. Гэгээн Папыг Вьетнамд ч гэсэн айлчлаасай гэж хүсэж байна. Би Монголд сарын өмнө ирээд гэгээн Папыг ирэхийг тэсэн ядан хүлээсэн.
