Сагсан бөмбөгийн 3х3 төрлийн 18 хүртэлх насны Дэлхийн Аварга Шалгаруулах Тэмцээн (ДАШТ) Унгарын Дебрецен хотод дөрөв дэх өдрөө үргэлжилж байна.
Нийт 40 баг оролцож буй тус тэмцээнд манай улсын 18 хүртэлх насны эрэгтэй, эмэгтэй шигшээ багийн тамирчид оролцож байгаа билээ.
Эмэгтэй шигшээ баг D хэсэгт Тайланд, Польш, Малайз, Тайвань улсын багуудтай өрсөлдөж гурван хожилтойгоор хоёр байрт шалгарсан.
Тэгвэл манай улсын өсвөрийн эмэгтэй шигшээ баг шөвгийн дөрөвт шалгарахын төлөө АНУ-ын шигшээ багтай маргааш тоглоно.
Харин өсвөрийн эрэгтэй шигшээ багийн тамирчид А хэсэгт Герман, Катар, Тунис, Ардчилсан Конго улстай өрсөлдөж байгаа бөгөөд нэг хожил, нэг хожигдолтойгоор гуравдугаар байрт бичигдэж байгаа юм.
Тэрбээр хэсгийнхээ гурав дахь тоглолтыг Тунисийн шигшээ багийн эсрэг өнөөдөр хийнэ.
