БШУЯ-нд "2023-2024 оны хичээлийн жилийн бэлтгэл" сэдвээр холбогдох бүх газар, хэлтсийн дарга нар мэдээлэл өгч байна.
БШУЯ-ны Дээд болон мэргэжлийн боловсролын удирдлага, зохицуулалтын газрын дарга Х.Тамир:
Одоогоор 30 дээд сургууль байгаа ба 2025 оны зургаадугаар сарын 15-наас хойш "дээд" гэсэн ангилал байхгүй, зөвхөн их сургууль, коллеж гэсэн хоёр төрөл байх юм.
Өнгөрсөн жил тооноос чанарт анхаарахаар 88 их дээд сургуулиас 27-гийнх нь үйл ажиллагааг зогсоож, өнөөдрийн байдлаар 65 их, дээд сургууль үйл ажиллагаа явуулж байна. Өнгөрсөн хавар 22 сургуульд албан шаардлага хүргүүлснийг шалгах ажил есдүгээр сард үргэлжилнэ.
Засгийн газрын наймдугаар сарын 23-ны тогтоолын дагуу их сургуулийн харьяа төрөлжсөн ахлах сургуулийг зохион байгуулна. Төрөлжсөн ахлах сургуулиар дамжуулж сайн элсэгчийг бэлтгэх, дунд сургуулийн ачааллыг бууруулах болно. Цаашид төрийн өмчийн сургуулиудыг шаталсан тогтолцоотой, сургалт эрдэм шинжилгээ, үйлдвэрлэлийн цогцолбор хэлбэрээр хөгжүүлэх бодлого барина.
Багш бэлтгэх бодлого буюу төрөөс төлбөрийг даах талаарх мэдээлэл өгье. Босго оноог өмчийн хэлбэр харгалзахгүй ижил хэмжээнд тогтооно. Өөрөөр хэлбэл хувийн болон төрийн сургуулиуд ялгаатай биш, ижил байх юм. Босго оноог өөрчлөхгүй буюу 480 ба цаашид түүнээс ахиулах болно. Багш боловсролын шинэчлэл гурван тулгуурт бодлогыг гаргасан ба ерөнхий сайд нэгийг нь зарласан. Гарааны багш ямар мэдлэгтэй, хандлага, төлөвшилтэй байхыг тодорхой болгосон. Мөн
- багшийн стандартыг шинэчлэн батлах,
- багш бэлтгэх тогтолцооны схемийг шинэчлэх,
- багш бэлтгэх үйл ажиллагааны удирдлага зохион байгуулалтыг шинэчлэх,
- багшийн эрэлтэд суурилсан элсэлтийн хяналтыг тогтоох аргачлал боловсруулах,
- сургалтын хөтөлбөрийг шинэчлэх,
- үнэлгээний тогтолцоог шинэ шатанд гаргах ажлуудыг тус тус хийнэ.
Багш мэргэжлээр сурах оюутны төлбөрийг хөнгөлөх болсныг сошиал орчинд их бичиж байна. Мэдээж өндөр шалгуур тавина. Багшийн ангид элсэх босго оноог нэмэгдүүлэх шаардлагатай. Тэтгэлэгтэй сурах оюутанд буюу дуу, хөгжим, урлагийн авьяас шаардахаас бусад элсэгчдэд 500 оноог шаардаж, чанартай боловсон хүчин бэлтгэж чадна. Төрөөс төлбөрийг төлөх тохиолдолд голч оноог харгалзан цаашид үргэлжлүүлэх эсэхийг шийднэ. Төрийн мөнгөөр сураад багшаараа ажиллах шаардлагыг тавина.
