Зам, тээврийн хөгжлийн яамнаас автотээвэр, орон нутгийн авто замтай холбоотой цаг үеийн асуудлаар мэдээлэл хийлээ. Энэ үеэр Зам, тээврийн хөгжлийн яамны Автотээврийн бодлого, зохицуулалтын газрын дарга Э.Мөнхнасан дараах мэдээллийг өгсөн юм.
Тэрбээр "Тээврийн хэрэгслийн шинэчилсэн бүртгэлийг 2023 оны хоёрдугаар сарын 1 зургадугаар сарын 15-н хүртэл хийсэн. Тээврийн хэрэгслийн бүртгэлийн санд өнөөдрийн байдлаар 1 сая 79 мянган тээврийн хэрэгсэл бүртгэлтэй байна. Үүний 70 орчим хувь нь суудлын машин, 18.5 хувь нь ачааны машин, бусад хувийг нь автобус зэрэг машин эзэлж байна. Нийт тээврийн хэрэгслийн 78.3 хувь нь 10-аас дээш жилийн насжилттай байгаа бол 11.3 хувь нь долоогоос дээш жилийн насжилттай байна.
Үүний үр дүнд бүртгэлийн санд бүртгэлтэй тээврийн хэрэгсэл 1.264.000 байснаас сүүлийн 4-5 жил техник, хяналтын үзлэгтээ ороогүй, татвар, даатгал төлөөгүй 204 мянган тээврийн хэрэгслийг хассан. Тээврийн хэрэгслийн бүртгэл мэдээллийг цэгцэлж, өөрийн хүсэлтээр хасалт хийсэн 35 мянган тээврийн хэрэгслийг хассан. Ингэснээр татварын өр үүсдэг асуудлыг шинэчилсэн бүртгэлээр цэгцэлж, бүртгэл, мэдээллийн тоог бодит болгож ажилласан" гэв.
Төрийн болон орон нутгийн өмчид бүртгэлтэй тээврийн хэрэгслийн улсын дугаарын өнгийг солиход 47 аж ахуйн нэгж үнийн санал ирүүлжээ.
Үүнээс хамгийн хямд нь 29 мянган төгрөгийн үнийн санал ирүүлсэн байна. Өчигдрийн байдлаар 117 тээврийн хэрэгсэл цэнхэр дугаараа солиулжээ.
