Нийслэлийн хэмжээнд ерөнхий боловсролын 60 сургууль өөрийн гал тогоотой, тэндээ сурагчдын үдийн хоолыг бэлтгэдэг. Харин 90 сургууль түрээсээр дээрх үйлчилгээг сурагчдад үзүүлдэг аж. Тэгвэл энэ жил 28 сургуулийг бие даасан гал тогоотой болгохоор ажиллаж байгаа талаар Нийслэлийн боловсролын газрын дарга олон нийтэд танилцууллаа.
Сургуулиуд түрээсийн гал тогоотой байгаа асуудлыг үе шаттайгаар шийдвэрлэнэ гэдгийг өнгөрөгч нэгдүгээр сард БШУ-ны сайд Л.Энх-Амгалан мэдээлж байв. Тэрбээр энэ талаар "Нийслэлийн сургуулиудын 70 орчим хувь нь түрээсийн гал тогоотой. Тооцоо хийгээд үзэхээр түрээсийн гал тогтоотой сургуулиудын нэг хүнд оногдох 1,500 төгрөгийн 800, 900 нь хувийнхны халаасанд ороод байгаа. Уг нь бол бүгд хүүхдийн аяганд орох ёстой. Ерөнхий боловсролын сургуулиуд түрээсийн гал тогоогүй байна гэдгийг хуульчилсан.
УИХ-аас баталсан Хоол үйлдвэрлэлийн тухай хуулиар гал тогоогоо түрээслэхийг хориглосон. Ганц жилийн дотор бүх сургуулийн түрээсийн гал тогоог гаргаж чадахгүй болохоор энэхүү арга хэмжээг үе шаттайгаар хэрэгжүүлнэ. 2020-2022 оны төсөв дээр сургуулиудыг гал тогоотой болгох, тоног төхөөрөмжөөр хангахад яамны зүгээс бодлогын арга хэмжээ хэрэгжүүлнэ" гэж байв.
