"330 суманд байгаа сургуулиуд заавал 12 жилийн тогтолцоотой байх албагүй. 10-12 дугаар ангидаа цөөхөн хүүхэдтэй байгаа сургуулиудыг сум дундын ахлах сургууль болгон өөрчлөн зохион байгуулна" хэмээн Боловсрол, шинжлэх ухааны сайд Л.Энх-Амгалан байр сууриа илэрхийллээ.
Түүнчлэн тэрбээр гурван ээлжээр хичээллэх эрсдэл тулгарсан сургуулиудад ямар арга хэмжээ авч хэрэгжүүлэх талаар дараах мэдээллийг өгөв.
"Ашиглалтад орохгүй удаж буй СХД-ийн 12 дугаар сургуулийг нэрлэмээр байна. Энэ сургууль үндсэндээ ашиглалтад орохгүй гурван жил болж байгаа. Төсөв нь л нэмэгдээд байдаг. Тус сургуулийн барилгын эхний цогцолборуудыг аравдугаар сарын 1-н гэхэд хүлээж авах зохицуулалтыг хийж байна. Тав, 71 дүгээр сургууль баригдаад дуусчихсан мөртлөө цоожлоод хоёр жил болчихсон.
Энэ нь тухайн барилга гүйцэтгэж байгаа компаниудтай төр үл ойлголцолтой, төрийн байгууллагуудын ажлын уялдаа холбоо, зөвшөөрлийн асуудлаас болж байна. Тиймээс есдүгээр сарын 1-н гэхэд тав, 71 дүгээр сургууль, 26 дугаар хороонд баригдаж байгаа хоёр сургууль, нэг цэцэрлэгийн үйл ажиллагааг нээнэ. Харин 62, 12 дугаар сургуулийг яаралтай ашиглалтад оруулна" хэмээв.
Улаанбаатар хотод гурван ээлжид орох эрсдэл үүссэн сургуулиудын хэв шинжийг нь бид харах ёстой. 84 дүгээр сургууль, Эрдмийн өргөө цогцолбор ч гэдэг юм уу 6,000-аас дээш хүүхэдтэй сургууль бий болчихсон байна. Энэ сургуулиуд хичээл, боловсролын чанарын тухайд хүндрэлтэй байгаа юм" хэмээв.
"ШУТИС, ХААИС, МУИС-ийн харьяа төрөлжсөн ахлах сургуулийг бий болгоно"
Энэ хичээлийн шинэ жилээс эхлэн нийслэлд төрөлжсөн ахлах сургуулиудыг зохион байгуулах аж. Энэ талаар Боловсрол, шинжлэх ухааны сайд Л.Энх-Амгалан "ШУТИС, ХААИС, МУИС-ийн харьяа төрөлжсөн ахлах сургууль гэх мэтчилэн байх юм. Ганцхан Улаанбаатар хотод биш орон нутагт байгаа их, дээд сургуулийг түшиглэсэн төрөлжсөн ахлах сургууль бий болгоно.
Сургуулийн зориулалтын бус объектуудыг худалдаж аваад сургуулийн зориулалтынх болгож өөрчилнө. Нийслэлд 500 тэрбум төгрөгийн бонд гаргаж байгаа. Үүний 100 тэрбум төгрөгийг олон жил ашиглалтад орохгүй хүлээгдэж байгаа сургууль, цэцэрлэгийн барилгын ажлыг эрчимжүүлэхэд чиглүүлнэ" гэдгийг хэлэв.
