Лондон хотод явуулсан тусгай ажиллагааны үр дүнд Швейцарын музейгээс хулгайд алдагдаад байсан Мин гүрний үеийн $2.5 саяын үнэтэй ваарыг олж илрүүлснээ Их Британийн цагдаагийн газар Бямба гарагт мэдээлжээ.
2019 онд Женев хотын Алс Дорнодын Урлагийн музейгээс гурван эд зүйлс хулгайд алдагдсаны нэг нь уг ваар байсан юм.
Ваарыг зарахаар оролдож байсан гэмт хэргийн бүлгийн хоёр гишүүнийг баривчилснаа цагдаа нар бас мэдээлжээ.
Ингэснээр Швейцарын музейн хулгайд холбогдсон сэжигтний тоо нийтдээ тав болсон байна. Тэд бүгд Британийн иргэд юм.
Наймаачны дүрд хувирсан цагдаагийн ажилтан ваарыг $573,000 орчмоор худалдаж авах саналыг гэмт этгээдүүдэд тавиад Лондон хотын төвд орших зочид буудалд нууцаар уулзсан байна. Энэ үеэр цагдаа нар баривчлах ажиллагаа явуулжээ.
Хулгайд алдагдсан ваар нь Мин улсын Юнле хааны (1402-1424) засаглалын үед хамаарах ховор дурсгал юм байна.
Ваартай цуг хулгайлагдсан бусад эд зүйлсээс $100,000 гаруйн үнэтэй хоолны сав 2019 онд Хонконгийн дуудлага худалдаанд зарагдсаныг сүүлд музейд буцаан шилжүүлж байжээ.
Гурав дахь нь болох тахианы зургаар чимэглэсэн дарсны шаазан аягыг одоо эрэн сурвалжилж байгаа бөгөөд Британийн цагдаагийн газар олоход тусалсан хүнд 10,000 фунт стерлингийн ($12,734) шагнал амласан байна.
