"Нүүдэлчин” дэлхийн соёлын фестиваль Налайх дүүргийн “Тайж Хайрхан”-ы бэлд өнөөдөр нээлтээ хийлээ. Соёлын биет бус өвийн 7 ай савын 362 төрөл зүйлийн хүрээнд 30 гаруй хөтөлбөрийн дагуу зохион байгуулагдаж байна. Нүүдлийн соёл иргэншил бүхий 10 гаруй улсын төлөөлөл оролцож нийтдээ 1100 гаруй нүүдэлчид хуран чуулж байна.
“Нүүдэлчин” дэлхийн соёлын фестивалийг нээж Соёлын сайд Ч.Номин: “Алсын хараа-2050” Монгол Улсын урт хугацааны хөгжлийн бодлогод “Үндэсний оюун санаа, өв соёл, сэтгэлгээнд тулгуурласан бүтээлч монгол хүн төвтэй нүүдлийн соёл иргэншлийг хадгалсан тэргүүлэх улс болно” хэмээх зорилго дэвшүүлж, Монгол Улсын Засгийн газар 2020-2024 оны үйл ажиллагааныхаа хөтөлбөрт “Дэлхийн нүүдлийн соёл иргэншлийн төв болно” хэмээн тусгасан бөгөөд 2023-2025 оныг “Монголд зочлох жил” болгон зарласантай холбогдуулан Монгол Улсын Засгийн газар 2023 оны 5-р сарын 17-ны өдрийн 183 дугаар тогтоолыг гаргаж “Нүүдэлчин” дэлхийн соёлын фестивалийг бүс нутаг, олон улсын хэмжээнд өргөтгөн “Тайж хайрхан” хэмээх энэ сайхан байгалийн үзэсгэлэнт газар зохион байгуулж байна.
Дэлхий дээр нүүдлийн болон суурин хэмээх соёл иргэншлийн хоёр үндсэн төрөл бий хэдий ч олон мянган жилийн түүхийн он цагийн эрхээр нүүдэлчдийн ахуй амьдрал, өв соёл, ёс заншил хувиран өөрчлөгдөж, улиран мартагдахад хүрч, өнөөдөр дэлхий дээр нүүдлийн соёлын ул мөр улам бүр бүдгэрч байгааг Та бид мэдэж байгаа. Тийм ч учраас хүн, мал, байгалийн харилцан шүтэлцээн дээр бий болсон Монголчуудын уламжлалт аж төрөх арга ухааны нэг “Монгол нүүдлийн зан үйл”-ээ UNESCO-ийн “Соёлын биет бус өвийн конвенц”-д бүртгүүлэхээр илгээснийг дуулгахад таатай байна.
