Германд болсон 2 жилийн өмнөх сонгуулиар байгуулагдсан эрх баригч эвслийнхний нэг амлалт нь “насанд хүрсэн иргэдэд каннабисыг таашаал хүртэх зорилгоор буюу 25 граммаас хэтрэхгүй тунгаар худалдаалахыг зөвшөөрөх" хууль батлах байсан.
Тэгвэл Германы Засгийн газрын хуралдаанаар наймдугаар сарын 16-ны өдөр “өвс”-ийг хууль ёсоор худалдах хуулийн төслийг хэлэлцсэн байна. Судалгаагаар Германд 4,5 сая орчим хүн хар захаас “өвс” худалдаж авдаг байна.
Германы Эрүүл мэндийн сайд Карл Лаутербах 16-нд хуулийн төслийг танилцуулахдаа, одоогоор энэ төсөлд гурван асуудлыг эцэслэн шийдээгүй байна. Нэгдүгээрт, хуульчилснаар өсвөр насныхан, залуучуудын хэрэглээг өсгөхгүй байх талаар ямар арга хэмжээ авах, хоёрт хар тамхины дагасан гэмт хэргийн гаралт, гуравт мансуурах бодисыг бусад төрлийн эм, эмийн бодистой холих тохиолдол нэмэгдэж болзошгүй эрсдэлээс урьдчилан сэргийлэх зэрэг гэж үзжээ.
25 грамм буюу гурван бут өвс
Хуулийн төсөлд насанд хүрсэн хүн 25 грамм каннабис буюу гурван бут эзэмшихээр тусгажээ. Гэхдээ цэвэр гашиш хэлбэрээр биш гэдгийг тодотгосон гэнэ. Гурван буттай болохын тулд орон нутгийн удирдлагаас тусгай зөвшөөрөлтэй үйл ажиллагаа явуулдаг “ каннабис хайрлагчдын клуб”-т нэгдэж, мөн тарих хадгалах зөвшөөрөл авах ёстой аж. Клубууд ашгийн төлөө бус нөхөрлөл, хоршооны зарчмаар үйл ажиллагаа явуулах бөгөөд гишүүдийн тоог 500-гаар хязгаарласан байна. Тэд өөрсдийгөө сурталчлахгүй, клубын байр, танхимд, хаалганаас 200 метрээс дотор зайд “мансууруулах ургамал” татахыг хориглосон заалт оруулсан бөгөөд сургууль, цэцэрлэг, тоглоомын талбай, залуучуудын спорт байгууламжинд ч энэ хориг үйлчлэх аж.
Орон нутгийн удирдлагуудын зүгээс ийм клубууд борооны дараах мөөг шиг гарч ирэхээс урьдчилан сэргийлж, хатуу хяналт тавьж, зөвшөөрлийг хязгаартай олгох үүрэгтэй. Гэвч холбооны зарим муж энэхүү хуулийг эрс эсэргүүцжээ.
Хариуцлагын тогтолцооны хувьд заасан хэмжээнээс хэтрүүлж “өвс” хадгалсан, ургуулсан тохиолдол гурав хүртэл жилээр хорьж, торгох арга хэмжээ авна. Хэрвээ үүнээс их хэмжээгээр зөөвөрлөсөн бол таван жилээр хорих ялаар шийтгүүлнэ. Харин эвслийн гэрээнд заасан каннабисыг төрөлжсөн, тусгай зөвшөөрөлтэй дэлгүүрт худалдаалах тухайд хойшлуулсан нь дээр гэсэн байна. Хуулийг батлахаас өмнө тодорхой мужуудад туршилт хийхээр төлөвлөсөн бөгөөд Бременн, Франкфурт, Мюнхэн зэрэг муж туршилтад ороход бэлэн гэж мэдэгджээ.
Хуулийг эсэргүүцэгчид
Хуулийн төслийг боловсруулахаас өмнө дэмжигчид ба эсэргүүцэгчдийн дунд ширүүн маргаан өрнөсөн ч дэмжигчдийн ялалтаар өндөрлөж. Тэд Голланд, Испани, Португал, Мальта, Мексик, АНУ-ын 19 мужийн туршлагыг онцолж, хууль ёсны болсноор худалдаанд ногдуулах татвараар жилд 4.7 тэрбум евро төсөвт оруулна гэсэн байна.
Хуульчилснаар бүтээгдэхүүний чанар сайжирч, гэмт хэрэг буурч, эрүүл мэндэд аюултай бодис зардаг хар захын наймаа буурна гэж үзсэн аж.
Засгийн газрын энэ төлөвлөгөөг Германы эмч нарын холбоо, хүүхдийн эмч нарын холбоо, цагдаа нарын холбоо болон хууль хяналт, шүүх засаглалын зүгээс эсэргүүцсээр байна.Тэд хууль ёсны боллоо гээд хар тамхитай холбоотой элдэв гэмт хэрэг зөрчил буурахгүй, харин ч нэмэгдэж байгаа асар олон зөвшөөрөл, хяналтын систем нь олон хүнийг шоронд хүргэнэ гэжээ.
Эрүүл мэндийн сайд Лаутербах энэ бол хар тамхины өсөн нэмэгдэж байгаа хэрэглээтэй тэмцэх арга гэдэгт итгэлтэй байгаа төдийгүй ирээдүйд энэ хууль бол хар тамхи, хар тамхинаас үүдсэн гэмт хэрэгтэй тэмцэх Засгийн газрын бодлогод “эргэлтийн цэг” болно хэмээсэн байна.
Эх сурвалж: DW
