Их Британид үндэсний аюулгүй байдлын томоохон мөрдөн шалгалтын явцад Оросын талд тагнуул хийсэн хэрэгт сэжиглэгдсэн гурван хүнийг баривчилжээ. Тэд бүгд Болгар улсын иргэд бөгөөд өнгөрсөн хоёрдугаар сард саатуулагдснаас хойш өнөөг хүртэл цагдан хоригдож байгаа юм.
Тэднийг Оросын тусгай албанд ажиллаж байсан гэж таамаглаж байна. Тэднийг мөн их хэмжээний хуурамч бичиг баримт бүрдүүлсэн гэж буруутгаж байгаа юм. Тухайлбал, эдгээр бичиг баримтуудын дунд Их Британи, Болгар, Франц, Итали, Испани, Хорват, Словени, Грек, Чех улсын паспорт, иргэний үнэмлэх болон бусад бичиг баримтууд багтаж байна.
Дээрх гурван шүүгдэгчийг Үндэсний хэмжээнд тагнуулын эсрэг тэмцэх үүрэгтэй Лондонгийн Цагдаагийн газрын Терроризмтой тэмцэх албаны ажилтнууд Албаны нууцын тухай хуулийн дагуу баривчилсан юм.
Эдгээр хүмүүсийн нэрсийг тодруулбал, Орлин Русев 45 настай, Бидер Жамбазов 41 настай, Катрин Иванова 31 настай.
Орлин Русев 2009 онд Их Британид ирж санхүүгийн үйлчилгээний салбарт техникийн албан тушаалд гурван жил ажилласан. Баривчлагдахаасаа өмнө Их Ярмут дахь зочид буудалд амьдарч байсан Русев нэгэн цагт Болгарын Эрчим хүчний яамны зөвлөхөөр ажиллаж байсан гэж мэдэгджээ.
Харин Харроуд амьдарч байсан Жамбазов, Иванова нарын хуучин хөршүүд тэднийг гэрлэсэн хосууд гэдэгт итгэдэг байв.
Жамбазов эмнэлгүүдэд жолоочоор ажилладаг байсан бөгөөд Иванова хувийн эмнэлгийн компанид лаборантаар ажилладаг байжээ.
10-аад жилийн өмнө Их Британид нүүж ирсэн "хос"-ууд Болгарын иргэдэд "Британийн нийгмийн соёл, хэм хэмжээ"-тэй танилцуулах зэрэг үйлчилгээ үзүүлдэг олон нийтийн байгууллага ажиллуулдаг байжээ.
Интернетэд тавигдсан Болгарын төрийн баримт бичгүүдээс үзэхэд тэд Лондонд мөн Болгарын сонгуулийн үеэр гадаадад амьдарч буй Болгарын иргэд санал өгдөг сонгуулийн хороодод ажиллаж байжээ.
Жамбазов, Иванова хоёрын өмнө нь амьдарч байсан хоёр байшингийн хөршүүд заримдаа хөршүүдээ гар хийцийн бялуугаар дайлж байсан гэж ВВС-д өгсөн ярилцлагадаа дурджээ.
Их Британи дахь Оросын тусгай албаны үйл ажиллагаатай холбоотой шуугиан тарьсан үйл явдлуудыг эргэн санавал:
2018 онд Оросын тусгай албаныхан Солсбери хотод давхар агент асан Сергей Скрипал болон түүний охин Юлия нарыг үхлийн аюултай Новичок гэх бодис ашиглан хөнөөхийг завджээ. Скрипалуудын хэргийн газарт ирсэн мөрдөгч Ник Бэйли амьд үлдсэн бол тэдэнтэй ямар ч холбоогүй орон нутгийн оршин суугч Даун Стержесс үнэртэй усны саванд орхисон мэдрэлийн бодист хордож нас барсан юм.
2006 онд Оросын тагнуулын ажилтан асан Александр Литвиненког Оросын төрийн төлөө ажилладаг агентууд цацраг идэвхт полонид хордуулсны улмаас Лондонд нас баржээ.
Эх сурвалж: ВВС
