Америкийн зэвсэгт хүчний түүхэнд АНУ-ын Тэнгисийн цэргийн хүчин анх удаа командлагчгүй үлдсэн тухай Ройтерс агентлаг мэдээллээ.
Тодруулбал, наймдугаар сарын 14-нд Тэнгисийн цэргийн хүчний одоогийн командлагч Майк Гилдэйн бүрэн эрхийн хугацаа дууссан. Гэтэл үүнтэй зэрэгцэн Лиза Франчеттиг шинэ командлагчаар томилохыг Алабама мужийн сенатор, Бүгд найрамдах намын Томми Тубервилл зөвшөөрсөнгүй.
Ингэхдээ тэрбээр цэргийн албан хаагчид болон тэдний ар гэрийнхний үр хөндүүлэх замын зардалд ил тод санхүүжилт байхгүй байгаа талаар сенатор өөрийн байр сууриа тайлбарлав.
АНУ-ын Дээд шүүх үр хөндөх үндсэн хуулиар олгогдсон эрхийг цуцалсны дараа Пентагон армийн албан хаагчид болон тэдний гэр бүлийн хүний үр хөндөлт хийлгэх боломжтой мужууд руу явах замын зардлыг хариуцахаар болсон юм. Бүгд найрамдахчууд энэ үйлдлийг эсэргүүцэж, үр хөндүүлэхэд зөвхөн иргэдийн оршин суугаа муж улсын харьяаллыг баримтлахыг шаардаж байна. Тиймээс тэд эсэргүүцлээ илэрхийлж, Сенат дахь АНУ-ын армийн гол албан тушаалд томилогдоход саад болж байгаа нь энэ юм.
Сенаторуудын энэ хоригийн улмаас Тэнгисийн цэргийн хүчин командлагчгүй үлдэж буй цэргийн гурав дахь салбар болжээ. Тухайлбал, энэ учир шалтгааны улмаас хуурай замын цэргийн болон тэнгисийн явган цэргийн командлагчдад нэр дэвшигчийг батлаагүй байгаа юм. Гэхдээ Ардчилсан нам Сенатад олонхи байгаа учраас Бүгд найрамдахчуудын энэ байр суурь эцсийн томилгоонд саад болохгүй. Харин түр хойшлуулах үр нөлөөтэй.
"Ийм алхмууд нь Америкийн байлдааны бэлэн байдлыг сулруулж байна. Тэд биднийг шилдэг офицеруудаа авч үлдэхэд саад болж, Америкийн олон цэргийн гэр бүлийн амьдралыг орвонгоор нь эргүүлж байна” гэж АНУ-ын Батлан хамгаалахын сайд Ллойд Остин хэлэв.
Өмнө нь АНУ Украинд цэргийн шинэ тусламж үзүүлэхээр шийдвэрлэсэн тухай мэдэгдэж байсан. Энэхүү тусламжийн нэг хэсэг болгон Вашингтон Киевт агаарын довтолгооноос хамгаалах систем түүний дотор Patriot цогцолбор, их буу, танк эсэргүүцэх Javelin систем, зэвсэг, мина устгах төхөөрөмж, мөн HIMARS олон пуужин харвагч, довтолгооноос хамгаалах сум зэргийг өгөхөөр төлөвлөж байна.
Эх сурвалж: Лента.ру
