Улсын хэмжээнд замын хөдөлгөөнд оролцож байгаа тээврийн хэрэгсэлд RFID чип буюу техникийн хяналтын цахим гэрчилгээ олгох ажлыг наймдугаар сарын 7-ноос эхлүүлээд буй. Эхний ээлжид нийтийн тээврийн 210 автобусанд тус чипийг байршуулсан байна. Энэхүү систем нь төрийн байгууллага болон авто замын хөдөлгөөнд оролцогчдын мэдээлэл солилцоог сайжруулах, хянах, удирдах, дүн шинжилгээ хийх боломж олгохоос гадна авто зам ашигласны төлбөр хураамж, татвар, оношилгоо, даатгал зэрэг тээврийн хэрэгслийн нэгдсэн сан бүрдэх юм. Түүнчлэн уг системийг нэвтрүүлснээр торгуулиа тодорхой хугацаанд төлдөг, заасан хугацаанд төлөөгүй бол алданги тооцдог болохоос гадна татвараа төлөөгүй, даатгалд хамрагдаагүй зэрэг зөрчилтэй тээврийн хэрэгсэл хөдөлгөөнд оролцох боломжгүй болно.
Мөн замын хөдөлгөөнд оролцогч жолооч нар машинаа хэзээ оношлуулах, төлбөр тооцоогоо цахимаар төлөх, аль зам засвартай байгаа, түр хаасан зэрэг мэдээлэл авах боломжийг бүрдүүлэх юм.
