Энэ сарын 5-ны өдөр түр зуур орсон хүчтэй аадар борооны улмаас Баянзүрх дүүргийн 21, 27, 29-р хорооны айл өрхүүд үерт автсан. Энэ талаарх нөхцөл байдлыг бид өмнө мэдээлсэн. Энд дарж уншина уу.
Тэгвэл НИТХ-аас БЗД-ийн 21-р хорооны 5 га газарт буюу эрсдэлгүй бүсэд нүүлгэх, мөн үер автах эрсдэлтэй 228 айл өрх эрсдэлгүй бүс рүү яаралтай нүүлгэн шилжүүлэхийг үүрэгдсэн.
Мөн дахин үерт өртөж болзошгүй нөхцөл байдлыг арилгахын тулд газар чөлөөлөх, далан сувгийг онгойлгох ажлуудыг хийх шаардлагатай гэв. Энэ тухай НЗДТГ-ын Хэвлэл мэдээлэл, олон нийттэй харилцах газраас мэдээлсэн.
Онцгой комиссынхон үерийн голомт болох Ганц худаг руу өгсдөг зам дагуу ажиллаж байгаа бөгөөд үерт өртсөн айлууд тэр чигтээ газрын зөвшөөрөлгүй байна хэмээсэн.
Дээр дурдсан газарт очиход үерийн аманд буюу усны урсгал хааж буусан зарим айлуудыг нүүн шилжүүлжээ. Түүнчлэн үерийн ус урсдаг жалганд шороо асгаж, тэгшилсэн газрыг ухаж шуудуу гаргаж эхэлжээ. Шуудууг ухаж, нягтшуулж орхино хэмээн тухайн нөхцөлд ажиллаж буй Геодизи усны барилга байгууламжийн газрын сурвалж хэлэв.
