Америкийн бизнесмэн Илон Маск "Meta" компанийн гүйцэтгэх захирал Марк Зукербергтэй хийх тулаанаа шууд дамжуулахаа зарлав. Тэрээр энэ тухайгаа 8-р сарын 6-ны ням гарагт өөрийн олон нийтийн сүлжээ болох "X" (хуучнаар Твиттер) хуудаснаа мэдэгдэв.
Тэрээр "Зук ба Маскийн тулааныг "X" -ээр шууд дамжуулах болно" гээд тулааны бүх орлогыг ахмад дайчдад зориулсан буяны ажилд хандивлана гэжээ.
Сануулахад, Маск зургадугаар сард Зукербергтэй рингэн дээр тулалдах хүсэлтэй байгаагаа мэдэгдсэн. Харин үүний хариуд "Мета"-гийн захирал бизнесмэний дуэльд бэлэн байгаагаа хэлсэн. Зукербергтэй хийх тулаанаа холимог тулааны урлагийн (ММА) дүрмийн дагуу явуулах ёстой гэж Маск мэдэгдээд байгаа. Үүний дараа тэр дуэль болох газрыг сонгосон. Энэ нь "Вегасын октагон" буюу Лас Вегас дахь UFC-ийн гол талбайг нэрлэсэн юм.
Зукерберг, Маск хоёрын хоорондох зөрчилдөөн Мета компани "Project 92" нэртэй Twitter-ийн өрсөлдөгч болох аппликейшн боловсруулснаа зарласны дараагаас эхэлсэн юм.
Америкийн BetUS букмейкерийн цахим хуудасны мэдээллээс үзэхэд АНУ-д тэд Зукерберг, Маск нарын тулаанд хэдийнэ бооцоо тавьж эхэлсэн бөгөөд энд Зукербергийн төлөө санал давамгайлж байгаа гэнэ. Үүний шалтгаан нь Метагийн тэргүүн тулаааны дасгал хийж байгаа бичлэгээ олон нийтийн сүлжээнд байнга нийтэлдэгтэй холбоотой байж болох юм. Мөн тэр бас жиу-жицүгээр хичээллэдэг бөгөөд энэ спортоор тэмцээн уралдаанд оролцдог байжээ.
ОХУ-ын ММА тулаанч, холимог тулааны дэлхийн болон Европын аварга Андрей Семеновын хэлснээр Маск, Зукерберг хоёрын тулаан болбол үзэж хараад байх зүйлгүй. Үзэгчид зөвхөн сүр дуулианых төлөө л энэ тулааныг үзэх болно гэжээ.
Эх сурвалж: Iz.ru
