ОХУ тус улсад нэвтрэхийг хориглосон Хятадын иргэдтэй "харгис" харьцаж байгаад сэтгэл дундуур байгаагаа Москва дахь Хятадын Элчин сайдын яам илэрхийлжээ. Долдугаар сарын 29-нд ОХУ, Казакстаны хилээр орох гэж байсан тус улсын таван иргэнийг шалган нэвтрүүлэх боомт дээр дөрвөн цагийн турш байцаасан” гэж Элчин сайдын яамнаас мэдээллээ. Тэднийг Оросын хилээр орохыг хориглож, жуулчны визийг нь цуцалсан гэж "Bloomberg" мэдээлэв.
"Оросын хууль сахиулах байгууллагуудын энэ харгис хэрцгий, хэтрүүлсэн үйлдэл нь Хятадын иргэдийн хууль ёсны эрх ашгийг ноцтой зөрчсөн" гэж Элчин сайдын яам баасан гарагт Хятадын WeChat нийгмийн сүлжээн дээр мэдэгдэв.
Хятадын Элчин сайдын яамнаас ОХУ-ын Гадаад хэргийн яам, Холбооны аюулгүй байдлын алба, Холбооны хилийн албанд хандсан мэдэгдэлдээ "Энэ нь Хятад, Оросын хоёр орны найрсаг харилцаа хандлагад харшилж байна" гэжээ.
Хятадын ЭСЯ-ны мэдэгдэлд дурдсан хэллэг нь Хятадын дипломатуудын барууны орнуудыг эсэргүүцдэг үг хандлагатай тохирч байна. Тухайлбал, ОХУ-аас “Болсон явдлын шалтгааныг тайлбарлаж, сөрөг нөлөөллийг арилгах идэвхтэй арга хэмжээ авч, цаашид ижил төстэй хэрэг явдал давтагдахгүй байхыг баталгаажуулахыг шаардаж байна" гэжээ.
Мөн "Орос улс хилийн албан хаагчдын хэтэрсэн үйлдлийн талаар нэмэлт мөрдөн байцаалт явуулж, Хятадын талд хангалттай хариулт өгөх ёстой" гэж Элчин сайдын яам нэмж хэлэв.
Эх сурвалж: Мoscowtimes.ru
