Саудын Арабын угсаа залгамжлах хунтайж Мохаммед бин Салман
Саудын Араб Украины дайныг энхийн замаар зохицуулах асуудлаар хоёр өдрийн хэлэлцээ хийж эхэлжээ. Украины Ерөнхийлөгч Владимир Зеленскийн санал болгосон дайныг зогсоох төлөвлөгөө тэнд яригдаж байгаа тул Жидда хотод болох уулзалтад Оросыг урьсангүй.
Хэлэлцээнд Украин, барууны орнууд болон хөгжиж буй орнуудын төлөөлөгчид оролцож байна.
Уулзалтад нийтдээ АНУ, Хятад, Энэтхэг, Бразил, Индонез, Египет, Мексик, Чили, Замби зэрэг 40 орчим орны дипломат төлөөлөгчид оролцоно.
Харин Жиддагийн оролцогчдын хэлэлцсэн нөхцөлийг Москва хүлээн зөвшөөрөх боломжгүй гэж үзэж байна.
Энэ удаагийнх нь зургадугаар сарын сүүлчээр Копенгагенд эхэлсэн хэлэлцээрийн үргэлжлэл болж байгаа юм. Данийн нийслэлд болсон уулзалтын үеэр Украин, G7 болон "дэлхийн өмнөд" орнуудын төлөөлөгчид Зеленскийн санал болгосон "Украины энх тайвны томъёололыг цаашид хэрэгжүүлэх" талаар ярилцсан юм.
Энэхүү Формула нь 1991 оны хилийн доторх газар нутгийг Украинд шилжүүлэх, ОХУ нөхөн төлбөр төлөхийг тусгасан.
Жидда хотод болж буй Төрийн тэргүүнүүдийн зөвлөхүүдийн уулзалтад дэлхийн 42 орны төлөөлөл оролцож байна гэж Зеленский мэдээлжээ.
“Улс орнуудын дэлхийн улс төрийн үйл хэрэгт хандах хандлага өөр. Гэхдээ олон улсын эрх зүйн тэргүүлэх ач холбогдол нь хүн бүрийг нэгтгэдэг бөгөөд үүний төлөө Украин энх тайвны томъёог санал болгосон. Учир нь Оросын түрэмгийллээр зөрчигдсөн олон улсын дэг журмыг сэргээх шаардлагатай байгаа юм” гэж Зеленский тодотгожээ.
Зеленскийн төлөвлөгөө
Копенгагенд болсон уулзалтын үеэр Киев хөгжиж буй орнуудыг Ерөнхийлөгч Владимир Зеленскийн энхийн төлөвлөгөөг дэмжихийг уриалжээ.
Тэрхүү төлөвлөгөөннд дурдснаар эзэлсэн бүх газар нутгаа Украинд буцааж, Оросын цэргийг гаргасны дараа л аливаа хэлэлцээр эхэлж болно гэж тэр үзэж байна.
Төлөвлөгөөний дэлгэрэнгүй:
- Цөмийн байгууламж , хүнс, эрчим хүчний аюулгүй байдал;
- Оросын нутаг дэвсгэрт байгаа Украины бүх хоригдлууд болон оршин суугчдыг суллах;
- Украины нутаг дэвсгэрийн бүрэн бүтэн байдлыг сэргээх;
- Оросын цэргийг гаргах, байлдааны ажиллагааг зогсоох;
- Шударга ёсыг сэргээх;
- Экоцид буюу экологийн сүйрэлд хүргэхээс сэргийлэх;
- Хурцадмал байдлыг дэвэргэхээс урьдчилан сэргийлэх;
- Дайны төгсгөлийн зураглал
Хөгжиж буй олон орон ерөнхий зарчмуудыг хэлэлцэхэд бэлэн гэдгээ өмнө нь мэдэгдэж байсан ч Зеленскийн төлөвлөгөөг дэмжих боломжгүй гэж WSJ тэмдэглэжээ.
Эх сурвалж: ВВС
