7-р сарын 25-нд БНХАУ-ын Бүх Хятадын Ардын Төлөөлөгчдийн Их Хурлын Байнгын хороо Чин Ганыг Гадаад хэргийн сайдын албан тушаалаас огцрууллаа гэж Синьхуа агентлаг мэдээлсэн.
Хятадын түүхэн дэх Гадаад хэргийн хамгийн залуу сайд гэгдэж байсан 59 настай 2022 оны сүүлчээс л сайдын албыг хашиж байв. Тэгэхээр түүний сайдын карьер үндсэндээ жил хүрэхгүй хугацаанд үргэлжилсэн гэсэн үг.
Чин Ган огцорхоосоо өмнө нэг сарын турш олон нийтийн өмнө нэг ч удаа харагдаагүй бөгөөд үүнийг дагалдсан олон таамаг гарч байв.
Энэ бүх хугацаанд экс сайд алга болсонтой холбоотой цорын ганц тайлбарыг 7-р сарын 11-нд ГХЯ-ны хэвлэлийн төлөөлөгч Ван Вэнбин хэлсэн. Түүний хэлснээр Чин Ган "эрүүл мэндийн асуудлаас болж" АСЕАН болон бусад хэд хэдэн арга хэмжээнд оролцоогүй гэсэн юм.
Экс сайдын асуудлын жинхэнэ шалтгааныг барууны хэвлэлүүд болон шинжээчдийн хамгийн их хэлэлцдэг хувилбаруудын нэг бол гэр бүлээс гадуурх харилцаа байв. Тэгвэл энэ таамаг эдүгээ нэр устайгаа нэлээд тодорхой түвшинд хэвлэлээр мэдээлэгдэж эхэлжээ.
Тодруулбал, тэрээр Хонг Конгийн "Финикс" телевизийн хөтлөгч Фу Сяотянь-тай гэр бүлээс гадуур харилцаатай байсан байж магадгүй гэжээ. Чин 2021 оны зунаас хойш Хятадаас АНУ-д суух Элчин сайдаар ажиллаж байсан бөгөөд Фу Сяотянь 2022 оны 3-р сард түүнтэй ярилцлага хийхээр ирсэн. Энэ яриа Хятадын албаны хүний хувьд маш албан бус, нэг хэсэг нь барилгын дээвэр дээр өрнөсөн гэж олон ажиглагчид тэмдэглэжээ. Фу бага насны хүүхэдтэйгээ хамт хувийн онгоцоор аялж явсан бөгөөд энэ тухай 4-р сарын 11-ний өдрийн твиттер хуудас дахь бичлэгээс нь харж болно. Мөн тэнд Чин Гангаас ярилцлага авч буй авсан гэрэл зураг бас бий. Харин түүнээс хойш энэ сэтгүүлчийн талаар ямар ч мэдээ гараагүй байна.
Харин Гадаад хэргийн шинэ сайд 69 настай Ван И 1982 оноос БНХАУ-ын Гадаад хэргийн яаманд ажиллаж байсан туршлагатай дипломатч юм. 2013 оны 3-р сараас хойш тэрээр Хятадын Гадаад хэргийн сайдаар бараг 10 жил ажилласан.
Чин Ган гэнэт сураггүй болж, эрх баригчид үүнд тодорхойгүй хариу үйлдэл үзүүлсний дараа түүнд ямар нэгэн ноцтой зүйл тохиолдсон нь тодорхой болсон гэж Европ болон олон улсын цогц судалгааны төвийн захирал Василий Кашин хэлэв. Хэрэв шалтгаан нь үнэхээр эрүүл мэндтэй холбоотой байсан бол ажлаас халагдахад нь тодорхой мэдээлэх байсан гэж шинжээч хэлжээ.
Үүссэн нөхцөл байдал бүхэлдээ БНХАУ-ын эрх баригчдын хувьд гэнэтийн байсан гэж Кашин үзэж байна, учир нь Ван И одоо нам, төрийн гэсэн гадаад бодлогын хоёр байр суурийг нэгтгэж байгаа нь ер бусын боловч үүнд албан ёсоор хориг тавиагүй байна. Яг одоо сайдын суудалд тохирох хүн олдохгүй байгаа учраас энэ хоёр албан тушаалыг хавсран хаших нь түр зуурынх болов уу.
Чин Гангийн хэргийг одоо ХКН-ын Сахилга бат шалгах төв комисс хариуцаж байгаа бөгөөд завхайрах нь өөрөө ноцтой зөрчил юм. Ийм зөрчил нь ХКН-ын намын дүрмийн дагуу сайдын карьерийг ч сүйтгэж болзошгүй гэж шинжээч дүгнэжээ.
Эх сурвалж: Vedomosti.ru
