Беларусь улсад байрладаг Оросын "Вагнер"-ийн 100 гаруй хөлсний цэргүүдийг Польш, Литвийн хилийн Сувалки коридор гэж нэрлэгдэх хэсэгт шилжүүлсэн тухай бямба гарагт Польшийн Ерөнхий сайд Матеуш Моравецки мэдэгдэв.
Сувалки коридор (Польшийн Сувалки хотын нэрээр нэрлэгдсэн) нь 100 км хүрэхгүй өргөнтэй Польш, Литвийг холбосон газар юм. Үүний баруун хойд хэсэгт Оросын Калининград муж, зүүн өмнөд хэсэгт Беларусийн нутаг дэвсгэр байдаг. Хэрэв Орос, НАТО-гийн хооронд зэвсэгт мөргөлдөөн болвол Орос улс энэ коридорыг хааснаар Балтийн орнуудыг Польш, Баруун Европоос тасалж чадна гэж ярьдаг.
Польшийн Ерөнхий сайд вагнерчуудыг дахин байршуулсан тухай мэдээллийг хаанаас олж авснаа хэлээгүй. Түүний мэдээлснээр хөлсний цэргүүд Беларусийн Гродно хотын нутаг дэвсгэрт байрласан байна. Моравецки үүнийг "Польшийн нутаг дэвсгэрт шинэ хайбрид дайралт хийх алхам" гэж нэрлэжээ.
Сүүлийн жилүүдэд Беларусийн нутаг дэвсгэрээс Польш болон ЕХ-ны бусад орнууд руу хууль бусаар хил давахыг завдсан хэрэг эрс нэмэгдсэнийг тэрээр дурсав. Тэдгээр нь Ази, Африкийн орнуудын хууль бус цагаачид юм.
Минск, Москва хоёрыг Польш болон ЕХ-ны байдлыг тогтворгүй болгохын тулд эдгээр оролдлогыг зохион байгуулсан гэж буруутгаж байна. Моравецкийн хэлснээр Вагнерийн хөлсний цэргүүд цагаачдад Польшийн хилээр гарахад нь тусалж чадна, мөн өөрсдийгөө цагаач мэтээр хил давахыг оролддог.
"Вагнер" болон Беларусийн эрх баригчид Моравецкийн мэдэгдлийн талаар хараахан тайлбар хийгээгүй байна.
Эх сурвалж: Svoboda.org
