- ChatGPT-д гуравдугаар сард үүссэн доголдлоор 687 Солонгос иргэний мэдээлэл задарчээ
- Улмаар OpenAI компанид 3.6 сая воны торгууль ногдуулаад байна
- ChatGPT нь 100 сая гаруй идэвхтэй хэрэглэгчтэй
БНСУ-ын Хувь хүний мэдээлэл хамгаалах хорооноос ChatGPT-г үүсгэн байгуулсан OpenAI компанийг 687 иргэний мэдээлэл задруулсан хэмээн 3.6 сая воны торгууль ногдуулжээ.
Тодруулбал гуравдугаар сард ChatGPT-ын систем хэсэг хугацаанд саатаж, хэрэглэгчдийн хайлтын түүхийг бусад хэрэглэгч харах доголдол үүссэн юм. Энэ хугацаанд ChatGPT Plus багцыг сонгосон хэрэглэгчдийн төлбөр төлсөн картын мэдээлэл мөн ил болжээ. Тухайлбал хэрэглэгчдийн овог нэр, цахим хаяг, картын сүүлийн дөрвөн орон, картын дуусах хугацаа зэрэг мэдээлэл нээлттэй харагдсан байна.
Мэдээлэл нь задарсан хэрэглэгчдийн дунд 687 Солонгос иргэний мэдээлэл мөн байжээ. Хувь хүний мэдээлэл хамгаалах хороо OpenAI компанийг доголдол илрүүлснээс 24 цагийн дотор удирдлагуудад мэдэгдэх үүргээ зөрчсөнийх нь төлөө торгууль ногдуулсан хэмээв.
ChatGPT өнгөрсөн оны 11 сард олонд нээлттэй болмогцоо таван өдрийн дотор нэг сая гаруй хэрэглэгчтэй болсон. Өдгөө 100 сая гаруй идэвхтэй хэрэглэгчтэй ба OpenAI сайтаар сар бүр нэг тэрбум хүн зочилдог аж.
Эх сурвалж: The Korea Times
