Ерөнхийлөгч Базум 2021 онд тангараг өргөж байв
Нигерийн цэргийнхэн ерөнхийлөгч Мохамед Базумыг түлхэн унагасан тухайгаа үндэсний телевизээр зарлав.
Тэд мөн үндсэн хуулийн үйлчлэл болон төрийн бүх байгууллагыг түдгэлзүүлж, баруун Африк дахь тус улсын хилийг хааж байгаагаа зарлав.
Хурандаа генерал Амаду Абдурахман “Улс орны аюулгүй байдлын нөхцөл байдал үргэлжлэн доройтож, эдийн засаг, нийгмийн байдал улам муудсаар байгаа учир бид энэ дэглэмийн үйл ажиллагааг зогсоохоор шийдсэн" гэж телевизээр хэлсэн үгэндээ онцолжээ.
Түүний хэлснээр, яамдын сайд нар өдөр тутмын ажлаа үргэлжлүүлэн хийх болно.
"Бүх гадаад түншүүд хөндлөнгөөс оролцохгүй байхыг хүсч байна" гээд "нөхцөл байдал тогтворжих хүртэл тэнгисийн болон агаарын хилийг хааж байна" гэж генерал мэдэгджээ.
Эх орноо батлан хамгаалах үндэсний зөвлөл хэмээн өөрийгөө нэрлэсэн цэргийн шинэ хунт улс орондоо орон нутгийн цагаар 22:00-05:00 цаг хүртэл хөл хорио тогтоожээ.
Ниамей хотын гудамжинд өдрийн цагаар байдал тайван байв
Босогчдын гарт ордондоо хоригдож байгаа Ерөнхийлөгч Базум АНУ-ын Төрийн нарийн бичгийн дарга Энтони Блинкен, НҮБ-ын Ерөнхий нарийн бичгийн дарга Антонио Гутерриш нартай утсаар холбогдож, өөрт нь дэмжлэг үзүүлэхийг хүсчээ.
Пүрэв гарагийн өглөө Ерөнхийлөгч Базумын твиттер хуудсандаа “Хэцүү бүхнийг туулан байж олсон амжилтууд хадгалагдах болно. Ардчилал, эрх чөлөөнд дуртай Нигерийн бүх ард түмэн үүнд санаа тавих болно" гэж бичжээ.
2021 онд ардчилсан сонгуулиар сонгогдсон Ерөнхийлөгч Базумыг Баруун Африк дахь лалын дайчдын эсрэг тэмцэлд барууны гол холбоотон гэж үздэг юм.
Баруун Африкийн далайд гарцгүй Нигер улсад 1960 онд Францаас тусгаар тогтнолоо олж авснаас хойш дөрвөн удаа төрийн эргэлт гарсан бөгөөд одоогийн засгийн газрыг түлхэн унагаах оролдлого хэд хэдэн удаа бүтэлгүйтсэн юм.
Тус улсад хамгийн сүүлд 2010 оны хоёрдугаар сард төрийн эргэлт гарч, Ерөнхийлөгч Мамаду Танжийг түлхэн унагаснаар өндөрлөж байв.
Жихадистууд Нигерт мөн үйл ажиллагаагаа явуулдаг. Тус улсад Аль-Каида болон Исламын улстай холбоотой бүлэглэлүүд үйл ажиллагаагаа явуулдаг.
Мали, Буркина Фасо зэрэг хоёр хөрш улсад нь саяхан төрийн эргэлт гарсан бөгөөд аль алийг нь жихадистуудыг санаачилсан гэж үзэж байгаа юм.
Эх сурвалж: ВВС
