Владимир Путины оролцоотойгоор долдугаар сарын 27-28-нд Санкт-Петербургт болох Орос-Африкийн дээд хэмжээний уулзалтад тус тивийн ихэнх удирдагчид оролцохоос татгалзжээ.
ОХУ-ын Ерөнхийлөгчийн туслах Юрий Ушаковын хэлснээр Африкийн 54 орноос ердөө 17 нь л төрийн тэргүүний түвшинд оролцох юм байна. Мөн Африкийн арван орны төлөөлөгчдийг Ерөнхий сайд нар ахална. Дээд хэмжээний уулзалтад оролцогчдын бараг тал хувь нь хоёрдугаар түвшний төлөөлөгчдөө илгээжээ. Тухайлбал, тэдний 17-г нь Засгийн газрын орлогч сайд нар тэргүүлж, таван улсыг Элчин сайд нар төлөөлж, мөн таван улс тус арга хэмжээнд оролцохоос татгалзжээ. Энэ тухай Москва таймс сонин бичжээ.
Энэ нь 2019 онд Африкийн 45 орныг хамгийн өндөр түвшинд төлөөлсөн ижил төстэй форумтай харьцуулахад хоёр дахин бага юм.
Оросын ГХЯ-ны Тусгай үүрэг гүйцэтгэгч Элчин сайд Олег Озеров Африкийн бүх улсын тэргүүнүүдэд дээд хэмжээний уулзалтын урилга илгээсэн гэж мэдэгджээ. Владимир Путин дээд хэмжээний уулзалтад ирсэн Африкийн удирдагч бүртэй уулзана. Ушаковын хэлснээр, ОХУ-ын Ерөнхийлөгч Египет, Мозамбик, Бурунди, Зимбабве, Уганда, Эритрей, Төв Африкийн Бүгд Найрамдах Улс, Конго, Ливи, Камерун, Сенегал, Өмнөд Африк, Буркина Фасо, Гвиней-Бисау, Мали зэрэг орны удирдагчидтай хэлэлцээ хийхээр төлөвлөжээ.
7-р сарын 28-нд Путин дээд хэмжээний уулзалтын үеэр үг хэлж, бүх улс орнуудын "олон туйлт, тэгш эрх" дээр суурилсан "дэлхийн шинэ дэг журам"-ыг бүрдүүлэх тухай ярих болно гэж Ушаков мэдэгдэв.
Путин уулзалтын урдах өдөр өгүүлэл нийтлүүлж, Зөвлөлтийн үед Африкийн орнуудад үзүүлж байсан эдийн засаг, техникийн туслалцааг сануулж, Орос-Африкийн найрамдлын "гүн үндэс", Африкийн орнуудын шинэ ертөнцөд зохистой байр суурийн талаар онцолжээ.
Орос-Африкийн дээд хэмжээний уулзалт хоёр дахь удаагаа болж байгаа бөгөөд анхных нь 2019 онд Сочи хотод болсон юм. Тэр үед нэг ч улс урилгаас татгалзаагүй бөгөөд Ерөнхийлөгч, Ерөнхий сайдаар ахлуулсан 45 төлөөлөгч оролыож байсан бол энэ жил ердөө 27 болж буурав.
Дөрвөн жилийн өмнө Сочид болсон анхны дээд хэмжээний уулзалтын үеэр ОХУ-ын Ерөнхийлөгч Африкийн орнуудтай хийх худалдаагаа хоёр дахин буюу 40 тэрбум ам.доллар хүртэл нэмэгдүүлнэ гэж амлаж байсан. Гэсэн хэдий ч үнэн хэрэгтээ худалдааны хэмжээ өсөөгүй, харин эсрэгээрээ буурч, 18 тэрбум доллар болжээ. Путин нийтлэлдээ энэ тоог иш татсан байна. Үүний зэрэгцээ Африкт орж ирж буй гадаадын хөрөнгө оруулалтын ердөө нэг хувийг Орос эзэлдэг.
Эх сурвалж: svoboda.org
