БНХАУ-ын Гадаад хэргийн шинэ сайд Ван И.
Хятадын ГХЯ-ны сайд Чин Ган бүтэн сарын турш олны өмнө гараагүйтэй холбоотойгоор янз бүрийн таамаглал, цуу яриа үүсээд байсан. Харин түүнийг өчигдөр буюу Мягмар гарагт албан тушаалаас нь огцрууллаа гэж Хятадын төрийн хэвлэл мэдээллээ.
"Хятадын хууль тогтоох дээд байгууллага мягмар гарагт болсон хуралдаанаараа Ван И-г Гадаад хэргийн сайдаар томилох саналыг дэмжлээ" гэж төрийн мэдлийн Синьхуа агентлаг мэдээлэв. Мөн Чин Ганыг Гадаад хэргийн сайдын албан тушаалаас нь огцрууллаа” гэжээ.
Уг мэдээлэлд Чин Ганыг огцруулах болсон шалтгааныг дурдаагүй ч БНХАУ-ын дарга Ши Жиньпин түүний залгамжлагчийг томилох тухай зарлигт гарын үсэг зурсан тухай дурджээ.
Чин Ган Ши-Жиньпиний итгэлт хүн гэж тооцогддог байсан бөгөөд олон шинжээчид түүний сүүлийн үед дипломат албаны шатаар хурдан ахисаныг тэдний харилцаатай холбон тайлбарлаж байсан юм.
6-р сарын 25-нд Бээжинд ОХУ-ын ГХЯ-ны дэд сайд Андрей Руденкотой уулзсанаас хойш олны өмнө ил гараагүй Чин Гангийн хувь заяаны талаар Хятад хэдэн долоо хоногийн турш чимээгүй байлаа.
Түүний сураггүй байгаа нь албан тушаалаас нь огцруулсан эсвэл дотооддоо мөрдөн байцаалтын шатанд байгаа гэсэн таамаглалыг өдөөсөн юм.
Коммунист намын гадаад бодлогыг хариуцдаг Ван И урьд нь Гадаад хэргийн сайдаар ажиллаж байсан бөгөөд түүний одоогийн албан тушаал Засгийн газрын шатлалд Чин Ганы дээгүүр байрт эрэмбэлэгддэг юм.
Эрүүл мэндийн шалтгаанаар уу
Чинь Ган коммунист Хятадын түүхэн дэх хамгийн залуу Гадаад хэргийн сайд гэгдэж байв
57 настай Чин Ган өнгөрсөн арванхоёрдугаар сард албан тушаалдаа орж, Хятадын хамгийн залуу Гадаад хэргийн сайд болсон юм. Үүнээс өмнө тэрээр АНУ-д элчин сайдаар ажиллаж байв.
Гэвч 6-р сарын 25-наас хойш тэрээр олны өмнө гараагүй бөгөөд энэ нь интернетийн Хятадын сегментэд түүнд тохиолдсон явдлын талаар олон хувилбарыг бий болгосон.
Бээжин АНУ-тай харилцаагаа сайжруулахыг хичээж байх мөчид тэр ор сураггүй алга болсон гэж Британийн "Guardian" сонин онцолж байв.
Хожим нь Гадаад хэргийн яам түүнийг эрүүл мэндийн шалтгаанаар гэж мэдэгдсэн боловч дэлгэрэнгүй мэдээлэл өгөөгүй юм.
Хамгийн өргөн тархсан цуурхалуудын нэг бол Чин Ганг гэр бүлээс гадуурх харилцаатай байсан, энэ нь тогтоогдсоны дараа мөрдөн байцаалтын шатанд байгаа гэсэн мэдээлэл байв.
Харин Хятадын ГХЯ-ны төлөөлөгч Мао Нин энэ талаарх асуултад хариулахаас татгалзаж, "Би энэ талаар юу ч мэдэхгүй" гэж мэдэгдэж байв.
Эх сурвалж:ВВС
