“Монгол Хьюндэй Автомотив” ХХК-ийн захиалгаар үйлдвэр үйлчилгээний зориулалттай барилгыг “Улаанбаатар групп” компани Хан-Уул дүүргийн 15 дугаар хороонд байрлах “Режис плэйс” орон сууцанд тулган барьж эхэлснээс тухайн орон сууцны барилгад нуралт өгөх эрсдэл үүссэн байна. Энэ тухай “Режис плэйс” орон сууцны оршин суугчид Барилга хот байгуулалтын яаманд хандан гомдол, мэдээлэл хүргүүлжээ.
Гомдолд, “Монгол Хьюндай автомотив” ХХК-ийн барьж буй 20 давхар барилга баригдаж эхэлснээсээ хойш их хэмжээний шороо тоос босож, орчныг бохирдуулж, дуу чимээ ихээр гаргаж, хөрсний усыг усны суваг руу урсгах болсон. Үүний улмаас ойр орчимд оршин суух иргэдийн амгалан тайван байдал алдагдаж, эрүүл мэндэд ноцтой хохирол учрах эрсдэл бий болсон. Мөн Нийслэлийн Хот байгуулалт, хөгжлийн газраас 2021 онд “Монгол Хьюндай автомотив” ХХК-д Барилгын тухай хууль, Барилга байгууламжийн норм, норматив, дүрэм, стандарт, журмыг ноцтой зөрчин, Архитектур төлөвлөлтийн даалгавар олгосон. Тэр ч бүү хэл уг барилгыг Хан-Уул дүүргийн 15-р хороонд байрлах “Режис плэйс” орон сууцанд тулгаж барихаар төлөвлөсөн нь Барилгын тухай хуулийн 14 дүгээр зүйлийн хэд хэдэн зүйл заалтыг нойцтойгоор зөрчсөн бөгөөд тус барилгын суурьт суулгалт өгч, нурах эрсдэлийг бий болгосон” гэжээ.
“Режис плэйс” орон сууц нь В3 буюу дороо 3 давхар автомашины зогсоолтой ба газрын гүн рүү 20 орчим метрийн суурьтай. Харин “Монгол Хьюндай автомотив” ХХК-ийн барьж буй барилга нь газрын гүн рүү В1 буюу 1 давхар автомашины зогсоолтой байхаар төлөвлөгдсөн нь орон сууцны барилгын суурьт сөрөг нөлөө үзүүлэх эрсдэлийг үүсгэж байна гэж үзжээ. Оршин суугчдын зүгээс барилга барих зөвшөөрөл олгохдоо хөрш залгаа иргэд, оршин суугчдаас санал авалгүйгээр барилгын ажил эхлүүлснийг хууль зөрчсөн үйлдэл гээд тус барилгын зөвшөөрлийг Туул голын ай савд хамаарах хөрсний ус ихтэй газар олгосноос барилгын суурийг ухах явцад газар доороос их хэмжээний хөрсний ус гарч, нуур, цөөрмийн хэмжээтэй болж тогтсон ч барилгын ажил үргэлжилсээр байна гэв. Мөн “Монгол Хьюндай автомотив” ХХК-д Архитектур төлөвлөлтийн даалгаварт Нийслэлийн Хот байгуулалт, хөгжлийн газраас хөрсний усны аюулаас сэргийлэх, хамгаалалт хийх талаар огт тусгаагүй байна. Тиймээс тус компанийн барилгын ажлыг гүйцэтгэхдээ гадна хөрсний усыг бохирын худаг руу юүлснээс ойр орчмын барилгын бохир зайлуулах худаг дүүрч бөглөрөх эрсдэлийг үүсгэжээ.
Дээрээс “Гол гудамж замын зорчих хэсгийн ирмэгээс барилгажилтын улаан шугам хүртлэх зай 50 м-ээс багагүй байна” гэж заасныг зөрчсөн нь тодорхойр байхад зөвшөөрөл аж. Тиймээс “Монгол Хьюндай Автомотив” ХХК-ийн Архитектур төлөвлөлтийн даалгаврыг хүчингүй болгож, хууль зөрчиж бусдад хууль бус давуу байдал олгосон эрх бүхий албан тушаалтан, алба хаагчдад хариуцлага хүлээлгэж өгөхийг оршин суугчдын зүгээс хүсэж байгаа юм.
