Францын авьяаслаг хөлбөмбөгчин Килиан Мбаппегийн "ПСЖ" клубтэй үзэглэсэн гэрээ ирэх зун дуусна. Тиймээс тус клуб түүнийг дараа зун "Реал Мадрид"-д үнэгүй нэгдэхээр сэм тохиролцсон гэж хардах болжээ. Тэд эл санаагаа баталж, түүнийг улирлын өмнөх аялан тоглолтодоо авч явалгүй үлдээсэн бөгөөд гэрээгээ яаралтай сунгахгүй тохиолдолд зарна гэсэн хатуу байр сууриа мэдэгдээд байна.
Одоогоор түүнийг "Тоттенхэм", "Манчестер Юнайтед", "Челси", "Аль-Хилал", "Реал Мадрид" гэсэн таван баг идэвхтэй сонирхож байгаа юм. Саудын Арабын "Аль-Хилал"-аас Мбаппег 300 сая еврогоор худалдан авах эцсийн саналаа хүргүүллээ. Уг үнэлгээ Мбаппег дэлхийн хамгийн өндөр үнэтэй хөлбөмбөгчнөөр өргөмжлөх юм.
Хэрэв Мбаппе "Аль-Хилал" клубт нэгдвэл жилд 700 сая еврогийн цалин авна. Нарийвчлан тооцоолбол, тэрээр сард 58.33 сая евро, долоо хоногт 13.3 сая евро, өдөрт 1.9 сая евро, цагт 79,900 евро, нэг минутад 1332 евро, секундэд 22 еврогийн цалин авах боломжтой.
Ингэснээр Мбаппе дангаараа NBA-ын хамгийн өндөр орлоготой 17 тоглогчийн нийлбэрээс ч өндөр цалин авах билээ.
