Олон мянган жилийн нүүдэлчин ахуй нь далайд гарцгүй Монголын ард түмэнг гамшиг тохиолдоход хурдан дасан зохицох чадвартай болгосон мэт. Гэхдээ одоо монголчууд хүн ам, мөнгө, эрх мэдэл төвлөрсөн дэлхийн эдийн засгийн урт хугацааны өөрчлөлтийг даван туулахын тулд тэмцэж байна.
Монголын шинэ залуу Ерөнхий сайд нь ч үүнийг өөрчлөхийг хичээж байна. Тэрээр 1990 онд ЗХУ задарч, Монгол Улс ардчилсан улс болсноос хойших нэлээд өргөн хүрээтэй улс төрийн шинэчлэлийг хийж байна. Монголын Засгийн газар шинэ Зеландын парламентын тогтолцоог нэвтрүүлэх үүднээс мажоритар тогтолцоогоо шинэчилж, холимог тогтолцоог нэвтрүүлж байгаа нь дараагийн сонгуулиар Л.Оюун-Эрдэнийн удирдаж буй МАН Засгийн эрх мэдлээ алдахад ч хүргэж болзошгүй юм. Мөн тус улсын хамгийн чинээлэг, нэр хүндтэй гэр бүлүүдэд цохилт өгөх авлигын тэмцлийг эхлүүлж, Орос, Хятадаас өөрийгөө тусгаарлах оролдлого хийж байна.
Монголын Ерөнхий сайд Л.Оюун-Эрдэнэ Улаанбаатар дахь Төрийн ордон дахь ажлын өрөөндөө ярилцлага өгөхдөө “Монголд нуугаад байх зүйл байхгүй. Бид шинэчлэл хийх ёстой" хэмээсэн байна.
Тэрээр ЗХУ-д боловсрол эзэмшээгүй анхны Монголын удирдагч бөгөөд хүн амын 70 хувь нь 35-аас доош насныхан байдаг улсыг тэргүүлж байна. Гэвч тогтолцооны гажуудал, засаглалын хямрал, сүүлийн хорин жилд 14 удаа Засгийн газар солигдсон болон уул уурхайн салбараас хэт хамааралтай байсны улмаас Монгол Улсын хөгжил олон жилийн турш хоцрогдсон.
Түүнчлэн цар тахал дэгдэж, БНХАУ хилээ хааж, Орос Украины дайн эхэлсэн нь байдлыг улам дордуулав.
Л.Оюун-Эрдэнэ хэлэхдээ “Миний Ерөнхий сайдаар ажилласан үе цар тахал, дайн гэсэн хоёр гол асуудлаас онцгой шинэ нөхцөлүүдтэй тулгарч байна. Бид энэ байдлаас зарим нэг давуу талыг олох хэрэгтэй болсон. Бидний хувьд, Монгол Улсын хувьд хамгийн чухал зүйл бол эдийн засгаа бие даасан болгох явдал юм” гэлээ.
Саяхан Монгод гадаадын хөрөнгө оруулагчдыг өргөн хүрээнд хамруулсан чуулга уулзалт болсон. /МЭЗЧ-2023/ Энэ үеэр “Asia House”-ын шинжээч Мао Жоучен “Ирэх онд Монгол Улс Хятадын эдийн засгийн өсөлтийг гүйцэх төлөвтэй байна” гэдгийг онцолжээ.
Мөн Рио Тинто компанийн ТУЗ-ийн дарга Доминик Бартон “Дэлхийн нэлээд алслагдсан хэсэгт /Монголын Өмнийн говьд/ Манхэттэнтэй тэнцэх хэмжээний хүдрийн биет байна гээд бодоод үз дээ” гэжээ.
Бартон Оюу толгойг Солонгосын дайн дууссаны дараа гангийн аварга том POSCO компани Өмнөд Солонгост үйл ажиллагаа явуулж байсантай зүйрлэсэн. Тэр “1970 онд Өмнөд Солонгост ямар ч эрчим хүч байгаагүй. Тэд төмрийн хүдэргүй, коксжих нүүрсгүй, үйлдвэргүй байсан. Тус улсын нэг хүнд ногдох ДНБ 100 ам.доллар байсан. Дэлхийн банк зэрэг ихэнх санхүүгийн байгууллага тухайн үед үүнийг битгий барь гэж хэлсэн. Гэхдээ тэдэнд нэг л хүсэл тэмүүлэл байсан. Тэр бол маш хурдтай өсөн хөгжиж, аж үйлдвэржиж байгаа бүсэд үйлдвэрлэлийн тэргүүлэх нэг бааз болох явдал байв. Ингээд арав хүрэхгүй жилийн дотор Похан гэх жижигхэн загасчдын тосгон дэлхийн хамгийн том гангийн үйлдвэрлэлийн төв болсон юм. Энэ үйлдвэр эдүгээ дэлхийн хамгийн өндөр бүтээмжтэй тэргүүлэх гангийн үйлдвэрийн нэг болжээ. Одоо Өмнөд Солонгос нэг хүнд ногдох ДНБ-ий хэмжээ 52 мянган ам.доллар байна. Яг л ийм амбийцыг Монголд бас харж байна" гэж онцолжээ
Эх сурвалж: “The Sydney Morning Herald"
