Ираны эрх баригчид ОХУ Украины газар нутгийг өөртөө нэгтгэснийг хүлээн зөвшөөрөхгүй байгаа бөгөөд бүх улс орны нутаг дэвсгэрийн бүрэн бүтэн байдлыг хүндэтгэхийг дэмжиж байна гэж Ираны Гадаад хэргийн сайд Хоссейн Амир Абдоллахиан мэдэгдэв.
"Олон улсын эрх зүйн үндсэн дээр бүх улс орны нэн тэргүүний асуудал байх ёстой Украин зэрэг улс орон бүрийн нутаг дэвсгэрийн бүрэн бүтэн байдалд бид итгэдэг. Улс төрийн яриа хэлэлцээгээр дайныг зогсоох шаардлагатай гэж Тегеран үзэж байна" гэж мэдэгдэв.
Мөн Ираны нутаг дэвсгэрийн бүрэн бүтэн байдлын асуудалд Москва хөндлөнгөөс оролцохыг Тегеран хүлээн зөвшөөрөхгүй гэж сайд онцлоод Персийн булангийн Арабын орнуудын хамтын ажиллагааны зөвлөлийн хурал дээр гарсан дипломат дуулианы талаар дурджээ. Тэнд Оросын дипломатууд Ормузын хоолой орчмын Ираны өөрийнх нь гэж мэдэгддэг, АНЭУ ч бас нэхэмжилдэг гурван арлын статусын талаар яриа хэлэлцээ хийхийг уриалсан юм.
Энэ мэдэгдлийн хариуд Ираны Гадаад хэргийн яам ОХУ-ын Элчин сайд Алексей Дедовыг дуудаж эсэргүүцлээ илэрхийлсэн байна. Оросын талаас "тайлбар" авсан боловч Тегеран хангалттай гэж үзэхгүй байна гэж Абдоллахиан мэдэгдэв.
Персийн булан дахь Абу Муса, Их Тунб, Бага Тунб гурван арлыг 1971 онд Ираны цэргийнхэн хяналтандаа авчээ. Энэ арлуудыг хянаж байсан Их Британи Персийн булангаас цэргээ татаж, үүний дараа Арабын Нэгдсэн Эмират улс байгуулагдав.
Гэсэн хэдий ч Ираны эзэнт гүрний засгийн газар түүхэндээ энэ гурван арлыг өөрийн нутаг дэвсгэр гэж тооцдог байсан бөгөөд тухайн оны арваннэгдүгээр сард Арабын Нэгдсэн Эмират улс тусгаар тогтнолоо зарлахаас хоёр хоногийн өмнө арлыг цаашид хяналтандаа байлгахын тулд Иран флотоо тийш нь илгээжээ. Ираны цэргийн хүчин арлууд дээр одоо ч байсаар бөгөөд эдгээрээс зөвхөн Абу Муса арал дээр л хэдэн мянган хүн амьдардаг.
Эх сурвалж: Мoscowtimes.ru
