Meta-ийн Threads программ нээгдсэнээс хойш тав хүрэхгүй хоногийн дотор 100 сая хүн бүртгүүлсэн байна. Үүний үр дүнд Threads нь ChatGPT-ийн хоёр сарын дотор ижил тооны хэрэглэгчтэй болсон амжилтыг давж түүхэн дэх хамгийн хурдацтай хөгжиж буй аппликэйшн болсон гэж "Forbes" бичжээ.
Meta сайтыг үндэслэгч Марк Зукерберг 100 сая хэрэглэгчийн тоог давсан гэдгээ даваа гарагт баталлаа. Тэрээ "Дөнгөж тав хоносон гэдэгт би итгэж чадахгүй байна!" гэж Threads хуудсандаа бичжээ. "Энэ нь ихэвчлэн органик эрэлт хэрэгцээ бөгөөд бид сурталчилгааны хэрэгслийг хараахан эхлүүлээгүй байна" гэж тэр мөн тайлбарласан байна.
Threads аппликейшн нь АНУ-ын App Store болон Google Play Store дээрх хамгийн алдартай үнэгүй програм болсон гэж "Sensor Tower" мэдээлэв. Мөн "Data.ai" аналитик платформын мэдээлснээр энэ нь Оросын App Store-д мөн нэгдүгээрт бичигддэг.
Threads-ийн дээд амжилтыг Meta-ийн эзэмшдэг Instagram дахь бүртгэлээр дамжуулан хэрэглэгчийн бүртгэлийг хийж, профайлын мэдээллийг Threads-д хадгалдагтай холбон тайлбарлаж байна. WSJ-ийн мэдээлснээр Instagram хоёр тэрбум гаруй идэвхтэй хэрэглэгчтэй бөгөөд энэ нь Threads-д асар их түлхэц болсон.
7-р сарын 6-нд Threads микроблог аппликейшн дэлхийн 100 оронд нээгдсэн. "Bloomberg"-ийн мэдээлснээр Threads нь ЕХ-ны орнуудад хараахан ажиллаж эхлээгүй байгаа юм. Учир нь Meta дижитал зах зээлийн тухай шинэ хуулийн үйл ажиллагааны талаар илүү нарийвчилсан зааварчилгааг хүлээхээр шийджээ. Европын холбооны тухайд Threads болон Instagram хооронд өгөгдөл солилцоход хэрхэн хандах нь тулгамдсан асуудал болж байгаа юм.
Meta шинэ аппликейшнийг гаргаснаар 2022 оны 10-р сараас хойш тэрбумтан Илон Маскийн эзэмшилд байгаа Твиттерт тулгарч буй бэрхшээлийг ашиглахыг хичээж байна. Өнгөрсөн есөн сарын хугацаанд "The Wall Street Journal"-ын мэдээлснээр Твиттер олон тооны техникийн доголдолд орж, олон мянган ажилтнаа цомхотгож, хэрэглэгчид болон сурталчлагч нараа алдсанаас гадна контентыг зохицуулах систем нь муудсаны улмаас шүүмжлэлд өртөж байгаа юм.
Үүний зэрэгцээ хэвлэлүүд Meta болон Twitter-ийн хоорондох өрсөлдөөн нэмэгдэж байгааг тэмдэглэж, Маск шинэ программ гаргах явцад хэрхэн хандсаныг жишээ болгон дурджээ. Тэр Зукербергийг тулалдаанд уриалсныг Мета-гийн үүсгэн байгуулагч хүлээн авсан бөгөөд хоёр тэрбумтан тулаанд бэлтгэж байгааг нотолсон мэдээлэл интернетэд нийтлэгдсэн.
Элон Маскийн компани Meta-г оюуны өмчийг завшсан, Твиттерийн хуучин ажилчдыг өөрийн аппликейшнийг боловсруулахын тулд урвуулан авсан гэж буруутгаж, уг аппликейшнийг эхлүүлсэнтэй холбогдуулан Зукербергт хуулийн хариуцлага хүлээлгэнэ гэж сүрдүүлээд байгаа юм.
Эх сурвалж: tos.media
